PAKAI AWGIN

Thupi-1

Praying hands
Praying hands on open bible

(DOCTRINE OF BIBLE GOES TO CHRIST)

By Rev. Chomlhun

 

Pakai awgin kitichu hiche ahi, Pakai Pathen amatah in mihemte henga aseinom le ahetsah nom hohi ahinseina ama kamcheng ahi. Mipite palai dinga mikhat alhendoh’a Pakaiyin ahinsei chu ‘Pakai Awgin’ kiti ahi:

  1. Masanglaiyin Pathen thilgon in vannoiya kiel-lhahna kon kihinsona dingin Pathenin Joseph chu amangcha’n ahi. Mangin akihoupi’n amusah in thusoh ding ho ape’n hilchietna ape’n, Israel pumpi kihinsona ding thu ape’n khonung in Israel pumpi’n kihinso na’n aneitauvin ahi. Amos 3:7…Dihtah mong mongin Pakai Pathen in alhacha themgao ho henga phongdoh masa louvin aguh in imacha abolkha hih hiel e.
  2. Masanglaiyin Egypt gam’a Israel te sohchanlaiyin Pakai Pathen in soh’a kona huhdohna di’n Mose chu Nam-Thulhun ape’n tahsanna ding thu ape’n akhut’a thilboltheina jatsom ape’n, Egypt Lengte leh soh’a konin Pathen banthahat in ahuhdoh in ahi.
  3. 2015, January (Ollha), nimasani, Pakai Pathen thusei kahengah ahunglhung in ahi. Hitin aseiye, “ Kami mangsa Manasseh chate chunga dingin phongdoh in lang seidoh kitta’n, ti’n ahunglhung kitta’n ahi. ‘Pakai Awgin’ abu’a nasoding Manasseh nammite dinga Danbu nina pangding ahiti’n ahin seiye; ‘Doctrine of Bible go to Christ’ hi ahi. “Koima’n ama deideiya ahoulou ding keima thupeh leh thusahna hiding ahi ti’n”, Pakai Pathen in ahin seiye.

 

Thupi- 2

PATHEN IN EIHOUPINA

 

2015, (Ollha) January, nimasani chun Pakai Thusei kahenga ahunglhungin ahi, “Kanam mite Manasseh chate ading sunin lang phongdoh kitta’n”, ati’n ahi. Thuseina eipeta’n, keijong sut ding kati jong leh aban ahungkit tapo’n, hijeh chun sut ding kati jong sutding katitapoi. Aman sunin ti’a asei kajah lou jeh in Lhali sungin sutding helouvin kaumin ahi. Ka Inn huiyin asem-onin, bijouse aphelha ta’n, phehlhah lou ahithei lou phat in kaphelha ta’n ahi. Chuin khom tuna ding innbul (Foundation) tuna ding katetoh in innpi ding avai 18 ft. adung 20ft. anhonna ding avai 9ft. adung 30ft., chule kihuilha nading sambuh (Varanda) avai 10ft. adung 30ft. ti’a katetoh laitah hin Pakai thusei kahengah ahunglhungin, “Nangin na Inn sahna ding alet-aneo natetoh’a, anhonna geiya natetoh’a chuleh sambuh dingho changeiya natetoh banga kin jong hiche Bible a thu hi kathu kasut ahi. Thina danthu leh Chonsetna danthu, chule Lhagaova hinna danthu kasut ahi. Mihem te’n Thina thu ahetlou jeh uva Chonsetna danthu kapeh ahi. Hiche Bible a hi Mihem Chapa tahsan chan hingding’a bou ahi. Mihem Chapa leh Lhagao bou kibul ahi. Tahsan thu adang aumpoi. Na inn adung-avai ann honna ding, kihuilhana ding natetoh banga ken hiche Bible a hi Hinna Thu kasut ahi.” Timothy 3:16….Pathen in ahaikhum Pathen Lekhabu’a thu kisun chengse chu kihilna, kiphona, kipui-jangna dinga chonphat kisinsahna dinga phatah ahi.

Semtil laiyin Eden Huon a Thina Danthu ape’n, Thina Thupeh jong ana sang pouvin, Thina sungah amang thah tauvin ahi. Mose khangin Chonsetna Danthu ape’n, ahethei hih uvin Pathen thupeh jong anit pouvin apelkeh uvin ahi.

*Kenjong hiche Bible a hi kathu kasut ahin, Bible a hi Mihem Chapa kidopsangna leh Lhagao bulphuna ahi. Lhagaova kon’a thiljouse sodoh theina ahi. Lhagao panna lou, lhagao jaolouna chu Pathen in ahetpeh lou ahi. John 4:24..Pathen chu Lhagao ahi, ahoute’n Lhagao le Thutah a ahouding mong ahi. Hijeh chun lei mihem te’n jong ama i-hounauva hi Christa Lhagao inei louvu leh Ama’a ihithei loudiu ahi. Mathew 22:19…Hijeh chun Pakaiyin sum chu neivetsah un ati. Mathew 22:20..Hiche hi koilim le koimin chongem atin adongin ahile Caesar ahiti’n adonbut un ahi, 21,… chuphatin ama’n, “Caesar’a chu Caesar peuvin lang Pathen’a chu Pathen peiuvin”, ati. Hijeh chun Caesar sum chu Caesar peuvin Pakaiya ati chu mihem hi Pakai Pathen khutsoh ahi’n hijeh’a chu Pakai Pathen’a ihidiu ahi, ti’a aseina joh ahi. Genesis 1:26…Eihon eiho limin eiho tobang mihem semu hiti’n…ti’n ana semu’n ahi. Mihem lim hi Pathen mel ahin, isunguva Christa Lhagao inei tengu leh Christa’a ihidiu ahitai. Rome 8:9..Christa Lhagao neilou chu Christa’a ahipoi, tin akisunin ahi.

 

I-limu jong Pathen lim ahijeh’a Pathen in Pathen’a ihinao eiphondoh peh’u hi kicheh tah ahi. Hijeh chun Rome 8:9 chun hiti’a chu asei ahi. Pathen in na atoh ding tengle melchihna abolin chule kitepna in na atong jinge. Pathen in ama mimelchihna le ahina aphondoh:

  • Ama lim le ama melpu ihinao hi ahi;
  • Isunguva Christa Lhagao ineiyu hi akicheh na ahitai.

 

Hijeh chun Pathen in ama mihina leh ama-cha hina hi Bible’a konin hitihin eimelchih uvin ahi; Bible hi Pathen kamcheng ahin, Bible hin Lhagao abulphu ahi’n, mihemte chunga Lhagao panna lou Lhagao jaolouna chu Pathen in ahetphah lou ahitai.

 

Thupi- 3

KUKI NAMPI CHUNGA THIL UMHO

 

Israel mite’n Pakai Jesu asandauva thingpel’a ahin  khetbeh phat uvin Pathen in Israel adalhan khonung AD 70 chun Jerusalem Temple alhu’n Pathen in amite adalha tai. Amelmate khut’a apedoh in soh-le-kol in gamtin’a athethang tai. Manasseh Chate jong hi China Lengte soh’a konna ijamdoh jou nungun Satan in eina kiloikhom piuvin, Satan mangpa’n ama thilbolthei naho leh thahatna chu Pu teho ana pe’n, ana kiloi khompi’n ama-mi in anasemin, Satan mangpa’n jong thilha ho jotheina thu ape’n, hitichun ana kiloipen ahi. Hinlah Tonsot Pathen in ahe’n, Pathen in ama-mihina melchihna in Pu-le-Pate Doibom thu ho, chonna ngeiya anache’n khonung teng leh ama kom inung lhung thei nadiuva Changden’a Chang-Nungah poh thu hi amatoh ikinung jopmat diuva melchihna thu chondan khat’a eina peh’u ahi.

*Ama mihina leh melchihna ana peh’u, amakom nunglhun na thei eipeh’u hi Satan pa’n ahet jeh in, Satan pa’n jong Kuki Chate hi ikinung joptheilou nading uvin Sinkhana Thum in ana sinkha’n ahi.

* 2011 lai chun Pakai Pathen in ‘Nam Thulhun’ eiseisah’a, “Kanam mite chenna channa naseijou phat leh nanampi chunguva keima vaihom tange”, atibang chun kahung kipan uvin, hilaitah chun Churachandpur gamsunga hin Satanic ho ana kihathan lheh uvin, Satan hohi alamkaiyin nungah-gollhang seingailou jouse lhanmol’a jaanthip laiyin akikhom uvin, Pathen thu asei uvin vannoi nopsahna amang uvin, ama ho chun keiho jong eisuboi lheh uvin ahi. Mijouse’n amaho loi danin eina gel uvin, nohphahna tamtah kanatoh uvin ahi. Churachandpur gamkai sung kajou hin Nagaland a kacheu leh kamasang uvah Satanic ho ana lhungkit uvin, ana boilheh uvin ahi. Kei ho jong Satanic party chom eina hisah uvin ahi. Amaho jeh chun ginmona einei uvin, eisuboi lheh uvin ahi. Pathen lungsetna toh Nagaland kachaiyu chun Manja, Assam gamsunga kalhunu leh Satanic ho keiho masanga ana chekit uvin, amaho jeh chun boina lentah katoh kit uvin, Assam a kaseijou uvin NC Hills Songpijang kho kalhun’u leh keiho masangah Satanic ho ana lhungkit uvin, ama ho jeh chun keiho jong ginmona kachangkit tauvin, kana toh’u eisuboi lheh uvin ahi. Chujou chun Sadar Hills, Manipur kahung lhunu leh keiho masanga chun ana lhungkit uvin, amaho jeh chun vetdana kachang uvin hinlah Pathen lungset in Pathen thupeh banga kachai jou uvin Chandel gamkai sung kahung lhung uvin, chuti chun Satanic ho jong keiho masangah ana lhungkit uvin, hinlah agam mihon mi 9 tobang ana mandoh uvin Counselling anabol uvin Pathen thu’n ahoupi uvin taona ho anaman peh uvin ahi. Amaho jal chun keiho jong vetdana kana chang kit uvin ahi. Pathen thupeh bangin Chandel sunga kahin jo’u hin keiho jong innlam’a kakile tauvin chule hiche jou’a pat chun Satanic ho jong aum tapouvin ahi. Ken jong Pathen hengah kataovin, Ipi dinga Pathen thupeh banga Nampi damna dinga kaseiyu hilou ham? Iti’a ajahdau ham ti’a kadoh leh Pathen in eihil chenin ahi, “Satan pa’n sinkhana thum’a nasinkhau ahiye:

  1. Nam Thulhun naseiyu chu Satan pa’n amatah in nasuhboiyu ahi,
  2. Denomination lamkai jouse chu aman amanchah’a adoudal ahi,
  3. Pastor ho chu amanchah kit’a adoudal ahi. Hichun Pakaiyin keidingin denomination hohi kapochim tai, amaho kilungtona bou abolu ahi. Hinna Lhagao neilou Pastor ho jong eidou ahi”, atin ahi.

 

 

Thupi 4

HOU MASA JUDAISM HOU’A PATHEN LUNGLHAI LOUNA

 

  1. Isiah 24:5,6…Leiset hi asunga chengte noiya suhbohsan akijam thang tai. Ijeh inem iti leh amaho’n danthu jouse asukeh uvin, chondan thu ho asuse soh uvin, tonsot geiya kitepna chu asukeh tauve; 6..Hijeh chun Leiset hi gaosap nan achup ta’n asunga cheng te jong athemmo na jeh uvin agenthei tauve. Hijeh chun leiset’a chengte akihul gamtauvin mihem lhomcha bou akidalha tauve.
  2. Isiah 1:3,4…Bongchal chun apupa akihet in sangan in jong apu’n an apehna ankong ahei, Israel in vang ahephapo’n, kamite hin ahekhen thei himhim pouve, ati. Ohe chonset nammite themmona dimset nammite, gitlou bolte chilhah ho, gilou tah’a thilbol chapate, hiche miho hin Pakai adalha tauve. Israel mitheng pa chu adonda tauve. Ajam mangsoh’a ahitauve.

 

  1. Jeremiah 1:16…Chule keima eidon dauva agitlou najouse uva keima’n amaho douna’a thutanna kahin seiding ahi, ajeh chu, amaho’n Pathen chom-chom hengah gimnamtui ahalnam uvin amaho khutsoh thilsem ho chu chibai aboh uvin ahi.

 

  1. Isiah 1:13,14,15,…Thilto pannabei ho chu hintoh kit hih hiel uvin, gimnamtui jong keidinga thet umtah ahibouve, Lhathah nikho jong cholngah nikho jong Aboldiu khopi kikoukhom nikho hijong leh, themmo naleh khoppi theng ahivanga kadoutheilou ahiye; 14, Nalhathah Kut bol’u ahin phattepsa kut nabol jouseu hi kahin kho’a kadouthei lou kahot ahi; hiche ho chu keidingin pohgih bep ahi’n, aboncha’n kapochim tai, 15,..Nakhut phanga neihin santengu leh kamit kasinkhum ding nahiuve. Ijeh in-em iti leh tao-tao jeng jong le chun kangaipeh lou ding nahiuve, nakhut’u thisan adime.

 

  1. Rome 7:7…Chuti ahileh ipi isei dingu ham? Danthu hi chonsetna ham? Ahipoi, chonset chu ipi ahi ana helou kahi, danthu’a konna kahetdoh ahibouve. Ajeh chu papse hih un tihi danthu’n aseilou hileh ipi ahi kana hetlou ding ahi.

 

  1. Galati 3:21,…Chuti ahileh danthu hi Pathen thutep hilou ham? Chuti ahipoi, hinsah thei danthu kipe’a hile hiche danthu’a kona chu chonphatna hiteiya themchan na umtei ding ahi.

 

  1. John 5:45,…Keima nang ho Pa henga kaheh dingin ngaito hih un, naheh uva mikhat Mose nang ho’n nakinep piu chu aume.

 

Semtilin Pathen hin Adam chu thina danthu apeh ahi’n, hiche danthu peh thina ahetthei nadiuva Mose danthu hi chonna danthu ahi. Achonset’u kihetdohna dinga apeh joh ahi. Hijeh’a chu danthu anitjoulou nau hi Mose’n Pathen anga namite chonset nao hijat ahi, ti’a hung ding ding joh’a atun ahi.

 

  1. Galati 3: 10, 11,…Ajeh chu danthu’a chon chengse chu sapset changah ahiuve, ijeh in-em iti leh akisune, koi hileh danthu bu’a kisun chengse nitjom jing lou chu sapset chang ding ahi. 11, ahivang in danthu’a chonin Pathen ang’ah them achangpoi, ti akichen e. Ajeh chu michonpha chu atahsan vanga hing ding ahi, ti’a ahi.

 

  1. Rome 3:20,…Danthu jui’a thilbol’a mi koima a-angsunga them changjou lou ding ahi. Ijeh in-em itileh danthu’a chonsetna kihedoh soh ahi.

 

  1. John 10:8,… Keima masanga hung ho jouse chu gucha le michom ahisoh keiyin ahinlah kelngoi ho’n athu anangai pouve.

 

Hijeh chun, hiche Bible chang kitahlang hohin Pakai Jesu hung masanga hung chonsetna danthu, Mose Danthu hi aseina ahi.

 

  1. Hebrew 8:9,…Apu te’u apate’u Egypt gama kona puidoh ding ni’a akhut uva katuh’a ama hotoh kitepna kasemdoh a hiche kitepna tobang chu ahitapoi. Ajeh chu ama ho kitepna’a aumjom pouvin ahi. Chuti ahijeh’a chu keiman jong amaho kadonlou ahitai, ati.

 

Thupi 5

GO TO CHRIST

  1. John 3:15,…Koi hileh atahsan chan ama’a tonsot hinkemlou aneithei nadinga Mihem Chapa hi kidomsang ding ahi.

Hijeh chu Pathen Innpi sunga Pakai bou kidomsang ahi’n, Pakai natohna leh Pakai panna bou chu Pathen in ahet ahi. Pathen Innpi sunga Pakai Christa bou kibulphu ahi.

 

2.John 4:23,… Ahivangin phat ahung lhunge, tuhi ahi, chuteng leh ahoutah beh ho’n Pa chu Lhagao le Thutah a ahou diu ahi. Ijeh in-em iti leh Pa chun chutobang ho bou chu ahou dinga ahol ahi.

 

Phat ahunglhunge ati chu, Judaism a Pathen houna chu akichaiyin, Pathen Chapa Christa Lhagao neiya ama hou ding phat chu hunglhung ahitai, atina ahi.

  • Lhagao ati chu Christa Lhagao aseina ahi. Hebrew 8:10,… Hiche nikho ho nunga Israel toh kitepna kaphu ding chu hiche hi ahi, ati, Pakai chun. Alungthim uva kachondan thu pengting chule alungsung uva kasut ding ahi, chule keima ama ho Pathen hingting, ama ho jong kamite hiding ahiuve.

Ichonset ikihet’a lungheiya Christa ikisan teng leh Pakai chun ilungsunga a Lhagao eikhum peh’a Ama lhagao akona Pathen nei, Pathen cha hina sohdoh’a hiche lhagaova konna chu Pathen lim le Pathen mel pujoh akihitai. Hijeh’a chu Lhagao panna lou leh Lhagao jaona lou chu Pathen in ahetpeh lou ahi. Bible in asei, ‘Go To Christ’ ati ahi.

  • Thutah ati chu hiche ahi. John 14:16,…Jesu’n ajah uvah, “Kei hi lampi le Thutah chule hinna chu kahi, keiya chelou chu koima Pa kom alhung poi.”

Thutah ati chu Pakai Jesu ama tah hi Thutah ahi chule hinna jong ahi. Hijeh chun Christa neijouse hi Thutah jong aneiya hinna jong anei ahitai. Keiya chelou ati chu Pathen in ama tahsan jouse huhhinga tonsot aneina dinga Pathen in atun ahi. Mathew 28:18,…Vanna le Lei a thaneina jouse keima eikipe’a ahitai. Vanna thaneipa Jesu inei leh van tonsot hinna chu kinei ahitai. Bible in aseina chu hiche ahi; Mihem tahsa itobangin chonse jong leh Jesu Christa sunga ikikhumlut teng leh Pathen cha kisoh ahitai, ti’n Bible in hiti’n aseiye – lei mihemte chonset gitlou nao papsetna jouse hi Chirista Jesu’a ngailutna le hepina chun ahuhdoh’a asopthenga alhagao chun ahinsah ahi. Revelation 12:13,…Keima Alpha le Omega kahi’n chule amasa leh anukhah kahi, chule abul le aleh kahi.

 

 

Thupi 6

PAKAI AWGIN

Pakai thusei kahenga ahung lhungin Manasseh Chate ngai uvin, Keima na Pathen’u Israel Pathen chu kahi. Masanglaiya kahungvil laiyin, neina sanlou jeh uva nabonchao chung uva midangte khut’a kapehdoh uva kanungsun nahitauve, hinlah lhangtin moltin’a kaheng lang nasan uva nakana te hou jal’a kahinsan kit nahitauve. Rome 11:2 Pathen in ahetmasah mite chu apailha poi, Manasseh Chate hungthoudoh un keima’n kapanpi ding nahiuve, ti’n ahinsei tai. Isiah 51:13,14,15,16 17,…Chehi Manasseh chate dinga ana kisei ahi: 13,..Nangma’n nasumil tai Pakai na Pathen nasempa; Van jong ponbuh sona songdoh pa, Leiset khompi jouse phutdoh pa, chule ibol’a nilhum lhuma mibolgenthei pa lunghanna nagin jing jeng ham? Pakai misumang dinga ahung kigot teng mibolgenthei pa lunghanna chu hoiba ham? 14,…Akisonkun pa chu kilhakang vah ding, ama chu thijong thilouva lhankhuh ajotsuh jeng lou ding chule hai jong haisam lou ding ahiye. 15,…Ijeh in-em iti leh keima’n Pakai na-Pathen kahi’n twikhanglen jeng jong nuhling ji’a chuteng leh twi kidil thong jeju’a lhapa thaneipe’n Pakai kiti chu Ama min ahiye. 16,…Chule keiman nakam sungah kathu jouse kahumin, nangma jeng jong kabanjang limnoiya kasel nahi; van jong ponbuh sonbangin kasongin, Leiset khompi jong kaphutdoh e, chule Zion jah’a chun nangma kamite nahi kati, ati. 17,… Hung thoudoh mong-mongin, hungthoudoh mong-mongin, Vo’ Jerusalem hung thoudoh ta’n, nangma’n Pakai lunghanna khon chu Pakai khut’a konin nadon tai, lungvaina khon chu atoneng geiyin nadonvaset ta’n ahi.

Tumasanga Kuki Nampi chunga namdang miho’n gaal-le-tol’a ibol uva, gaal khat akichai leh gaal khat idou uva; ichung uva kilungkhat theilouna tam cheh cheh’a kibungkhen-kilangkhen na dimset’a ikipunkhom theilou nao hi Pakai Lunghanna ahitai. Akisonkunpa ati chu Kuki Nampi Manasseh son te aseina ahi’n, chule inampiu chatveina le kipunkhom theilou nahi Pakai lunghanna khon atoneng geiya idon’u ahitai. Chuti ahijeh’a chu Kuki Chate hi Manasseh Chate ahitihi, ikihetchen di’u ahi. Ahivangin Pakai Pathen in itao nao asangin Pathen in eihuhdoh tauve. Lungvaina khon chu nanungdon kit lou hieldiu ahitai, ti’n Pakai Pathen in kitepna aneitai. Isiah 54: 6-8,…Ajeh chu donlouva kikoi lungthim hesoh chu mi-jinu banga Pakaiyin nangma nakou ahita’n, Mouthah cha kida tobang nahi, ti’n Pakaiyin aseiye. 7,… Ijeh in-em iti leh phat chomkhat chu nang nakidalha ahita’n, hijong leh laina tah’a kachopkhom ding nahi. 8,…Phat chomkhat chu lungsatna letjeng junga kaheimang khum nahita’n hijong leh lungsetna gui tanlouva nachunga uva lainatna kanei ding ahiye, ti’n nalhatdampu Pakaiyin aseiye.

Isiah bung 54 apumpi’a hi tununga Manasseh chate’a dinga anasut ahi. Tu’n Pathen lungsetna ilhung tauvin, i-Pa’u Pathenin Leilam Phatthei na le Vanlam Phatthei na kapehdiu nahitai, ati. Hijeh chun Isiah 54: 12 apat achaina tokah hi Manasseh chate phatthei ichanna diuva asut ahi.

A Bible chu simu hite: Isiah 54: 12 – 17; Keima na inntingvum kitungdoh jouse songmantam’a kasem’a, nakelkot phung jouse jong songdul’a kajep ding, chule napaldung jouseu jong chu songmantam cha-cha’a kasem ding ahiye. 13,…Nahcapate abonchauva Pakaiyin ahilding nachanute nasatah’a hung houding ahiuve. 14,…Nang jong adih’a nakiphudet ding, bolgentheina gamlha tah’a nadalhah ding ahitai; Ijeh in-em iti leh nakichat kitlou hiel ding ahita’n ahi. Tijatna kona nagamlat ding ahi. Ajeh pentah chu hitobang chun nahin phah lou ding ahitai. 15,…Mikhattouvin kitomona asemdoh’a ahile hiche chu keiya hungkon ahipoi koi hijeng jong leh nangtoh kitomona semdoh chanchu nangma jeh’a kipallhu cheh ding ahi. Vetan keiman thih kheng’a meihol japjap pa adeiya amanchah ding manchah kikhenpa chu kasemsa ahiye. 16,…Keima’n thil sumangpa jong chu kasem ahiye. 17,… Hijeh chun nangma douna manchah kisem chan chu khangtou lou hiel ding ahi. Chule nangma’n jong thutan na’a nangdouna thusei leigui jouse chu nakisuhnoh phahsah gamding ahi. Hiche hi Pakai lhacha ho goulo ding ahi’n, keiya kon’a athepchan nadiu ahi,tin Pakaiyin aseiye.

Ken Manasseh Chate jouse’n ka-angsunga nahunglut sohkei diu nabon chauva kei na-Pathen toh ikiloikhom diu ahi. Kalungsetna danthu leh Lhagaova hinna danthu’a nahunglut sohkei diu ahi, chuteng leh na-Nampiuva kadamsah’a vannoi chitin-namtin anga kachoisang ding nahiuve.

 

 

Thupi 7

PATHEN IN AHOT PEN

Pakaiyin hitihin ahin seiye, “Manasseh Chate masanglaiya Sabbath Danthu’a kivaipoh nikholai, Judaism nikholai chu kahot’a kathet ahi, kichih theiyun, hichechu hilou ding ahi. Isiah 1:12-15,…Kahenga nahung tengu leh koiham keima innpi chonthang dinga kouvah? 13,…Thilto pannabei ho hintoh kit hih-hiel uvin, gimnamtui jong keidinga thet umtah ahibouve; Lhathah nikho jong cholngah nikho jong aboldiu khoppi kikoukhom nikho hijong leh, Themmo naleh khoppi theng ahivanga kadouthei lou ahiye. 14,…Na-lhathah Kut bol’u ahin, phattepsa kut nabol jouseu hi kahin kho’a kadeilou kahot ahi, hiche ho chu keiding in pohgih bep ahi. Aboncha’n kapochim tai. 15,…Nakhutphanga neihin sang tengu leh kamit kasinkhum ding nahiuve, Ijeh-iem iti leh tao-tao jeng jong leu chun kangaipeh lou ding nahiuve; nakhut’a thisan adime.

Hijeh chun tu’a Manasseh Chate in Pathen kom ilut nauva hiche thu hohi Pathen in adeilou ahot athet ahijeh’a angailou ho jouse chunga Pathen lunghanna chuding ahitai. Pakai Pathen kitepna ahung lhungtai.

 

 

 

Thupi 8

PATHEN IN JUDAISM DANTHU ASUBEI TAI

Isiah 50:1 Pakaiyin hitin naseiye, “Nanu’u kidana lekha keiman kadana chu hoiya um hitam? Ahilou leh kaleibate koipen kom’a chu nang ho kajohdoh nahiu hitam? Vetan nathemmo jeh uva nang ho kajohdoh nahitauve; chule nang ho suhkhel jeh’a na-Nu’u chu kida ahitai,” tin Pakaiyin aseiye.

Nanu’u kadana lekha hioja um hitam, ati chu Esther Lekhabu 1:11, 12,…Vashti Lengnu chu a Lal-lukhuh pum’a Lengpa anga hunglut’a mitin vaipi leh milen milalte chu amelhoidan chu vetsahna dingin thu apetai; ajeh chu Vashti Lengnu hi vetnom nom uma melhoi tah mi ahi. 12,…Ahivang in nu-kiso pasal sagi’n ahung seipeh Lengpa thupeh chu Vashti Lengnu’n apalkeh jengin anom tapon ahi. Hiche a hin Lengpa chu alung ahang behseh jeng in, asungah alungchang akitum lut-lut jeng ta’n ahi.

Esther 2:17,…Lengpa’n jong Esther chu numei dang jouse sangin adeipe’n in nungah donglai adang sese sangin jong Esther hin Lengpa mitmu’n alungdei dei ding leh alunglhaina ding jeng aboldoh tai; hijeh chun Lengpa’n jong Lal-Lukhuh chu amanu akhuh peh in Vashti Lengnu khelin ama joh chu Lengnu’n apansah ta’n ahi.

Pakai amatah in Israel Thusim eihilchet jeh’a ken jong chentah’a kahin seithei ahi; Esther Lekhabu’a achom lam’a ahilchenna:

  1. Lengpa hi vannoi pumpi gam jakhat-le-somnile sagi (127) a vaipo’a Lengpa, Tonsot Pathen Leng jouse Lengpa, Pakai jouse Pakai chu avetsah ahitai.
  2. Vashti Lengnu hi Lengpa inneipi ahi. Lengnu kiti ahi. Amelhoi dan jong vetnom nom’a hoi ahi. Numei jouse sangin jong ahoipen’e. Vashti Lengnu hin Sinai Mol’a kipe Danthu, Chonsetna Danthu, Sabbath Danthu vetsahna ahi. Pathen Danthu peh leh ahoipen ahi’n Pathen in jong adeipen ahi.
  3. Vashti Lengnun Lengpa thupeh apelkeh’a amelhoi jong mipi anga apohlut lou leh Lengpa le mipi anga alhun joulou chun Vashti Lengnu Mose Danthu hin Pathen anga apuilut joulou le aphatchom sah joulou dan chu avetsah ahi.
  4. Hiche jeh chun, Vashti Lengnu khel’a Lengpa deikhat kipansah ahi. Mose Danthu hin mihemte apui joulou le aphatchom sah joulou jeh’a Mose Danthu hi akhel ahitai, ahitai tihi avetsah ahi.
  5. Vashti Lengnu khel’a Esther kipansah 2:17,…Esther hi numei dang jouse sangin Lengpan adeipen in, nungah donghoi jouse sangin jong Esther hin Lengpa mitmu’n alungdei dei leh alunglhaina ding jeng aboldoh tai, hijeh chun Lengpa’n jong Lal-Lukhuh chu Esther Lengnu akhuhpeh tai.
  6. Esther hi Lengpa’n numei dang sanga adeipen ahina hin Esther hin Jesu Christa avetsah ahi. Jesu Christa hin milungset naleh hepina lhatdamna eipeuvin Pathen angsung eilhut tauve.
  7. Mordecai hi Esther dinga apa-ngah ahi. Mordecai hi Lhagaotheng vetsahna ahi. Lengte innsung vetup’a pang ahi. Esther hin Jesu Christa Pathen Cha vetsahna ahi.
  8. Haman hi Lengpa vanna pang thaneitah ahi. Amahi Satan pa vetsahna ahi. Hijeh’a chu Pathen in Danthu asubeiyin Jesu Christa Hinna Danthu abullut tai. Hichu kichen tah in akimutai.
  9. Hebrew 7:18-19,…Ajeh chu ahatmo leh aphatchomna ding ahijeh in Chonna Dan thupeh amasa chu amangthah tai. 19,…Ijeh inem iti leh Chonna Dan thupeh chun imacha asuchamkim po’n ahiye. Ama muna chu kinepna pha chungnung jo kibullut ahitai; hiche chu eiho’n Pathen kom ineinao ahi. Hebrew 8: 6-9,…Tu vang hin kitepna phajo cheh palaiya apan dungjui’a lhacha munpha chungnung jo’a panga kitepna chu thutep phajo ho chunga ahisah ahitai. 7,…Ajeh chu kitepna masa chu themmo na beihiel hileh, anina pa mun ding chu kingaito lou ding ahi. 8,…”Ajeh iham itileh amaho chu a-oimo’n: Ve’uvin keima’n Israel phungmite le Juda phungmi te dinga kitepna thah Kasemdoh ding nikho hunglhung ahitai,” ati Pakai chun. 9,… “Apu te’u apate’u Egypt gama kona puidoh ding ni’a akhut uva katuh’a amaho toh kitepna kasemdoh, hiche kitepna tobang chu ahitapoi; ajeh chu ama ho akitepnao vah aumjom pouvin ahi. Chuti ahijeh’a chu keima’n jong amaho kadonlou ahitai”, ti’n Pakai chun aseiye.
  10. Mathew 5:17,… “Keima Danthu le Themgao ho thu sumang ding hilouvin, asubulhit ding joh’a hung kahibouve:
  • Sabbath Danthu hin Amite thenna leh phatchomna apejou po’n; achonset nao joh kilang ahi.
  • Isiah 9:6,7… “Ijeh inem itileh, eiho dingin Naosen khat apengin Chapa khat eikipeuve; Alengkouva vaipohna apo’n, chule amin jong thumop them kidang tah thanei tah Pathen tonsot mipa Chamna Leng Chapa akiti. 7,…Avaipohna le chamna angahna beiya khangtou ding David Lenggam le Laltouna Chunga touva aphutdet ding leh adih’a thutanna tuhdet jing dinga tu’a pat atonsot geiya toujing ding ahi; Thaneipen Pakai tompanan hiche aboldoh ding ahi.” Isiah 52:7,… “Molsang chungvuma ding kipana thupha hinpopa kengphang chu iti hoiya hoi hitam? Kipana thupha chamna thu polepa huhhingna thu phong le’a Zion jah’a na-Pathen in Lengvai apoi, ti’a seipa chu.” Isiah 52:13,… “Veta’n kalhachapa chu hung khangtou tou intin choisanga hung um ding; hiti’a chu hasanga sanga hung sang ding ahiye.”

Pakai Jesu’n, keima danthu le themgao ho thu subulhit ding joh’a hung kahi, atilona hi, Sabbath danthu subulhit ding’a hung hilouvin lungsetna danthu, amite chunga lungsetna le ngailut, hepina hisah ding joh’a hung kahi atina joh ahibouve.

 

Thupi 9

PATHEN IN MANASSEH CHATE TOH KILOIKHOMNA APHUDOH

1.Masanglaiyin Pathen in Eden Huon sunga chun Adam le Evi anasemin chule hiche theiga hi naneh lhon lou ding, naneh nini lhon leh nathi tei-tei lhon ding ahi, ti’n Thina Danthu ape’n , amiteni toh Kitepna abolin, amiteni toh akiloikhom uvin Pathen jong alunglhai lheh in ahi. I-pau Pathen-Tonsot Pathen in amite’n athu angaiya akiloikhom teng lunglhaiji Pathen ahi.

2.Egypt gam’a Israel te sohchan’u chun Pathen in amite huhdoh nading in Mose amangcha’n tahsan na’n atilin, tahsan na’n akhoukhah in thilboltheina jatsom ape’n, abanthahat in apuidoh in gamthip noiya Dan Thusom ape’n, aphunchil le milouchal chengse, chule michonse ho asumangin thungai chengtoh kum 40 sungin ana kiloikhom uvin Pathen jong alunglhai tai; gaal jouse jong ajou uvin kipah thanomin gamtep gam apuilut tai.

3.BC 4000 laiyin Pakai amite toh kiloikhom kit dingin leiset’a tahsaphen ahung pengin hinlah amite’n ana sang pouve; John 1:11,… Ama amate dinga hung ahin amate’n ana ssang tapoi, chuphat in Pathen in Israel adalha ta’n ahi.

4.Tu phat nununga i-Pau Pathen in ama Nammite ihinauva eiholdoh uva, Manasseh chate toh kiloikhom nahi ahin phudet ahitai. John 4:23, 24,…Ahivang in phat ahung lhunge tuhi ahi; chuteng leh ahou tahbeh hon Pa chu Lhagao le Thutah’a ahou dingu ahi; Ijeh inem iti leh Pa chun chutobang ho bouchu ahou dinga ahol ahi. 24,…Pathen chu Lhagao ahi chule ahoute’n Lhagao leh Thutah’a ahou dingmong ahi, ati. Ephessus 4:4,5,6,…Tipum khat ahi’n chule Lhagao khat ahi. Hiche banga chu nakikounao jong kinepna khat’a kikou nahiuve. 5,…Pakai khat Tahsan khat, Baptise chan khat. 6,… CHule mijouse Pa leh Pathen khatseh bou ahi. Ama imajouse chunga ahi’n hoima jouse’a um ahi; chule Lungsung jouse’a um ahi.

 

Hiti ahijeh chun Bible’a Tahsan dang aumpon hiche Bible chang ho’a i-Pakaiyu Jesu Christa toh pumkhat’a ihikhom uva, ikiloikhom diuva Pathen in eisuhdet’u ahitai.

 

Thupi 10

GINDAN DIHLOU

(Tahsan na dihlou)

 

Lei mihem te’n Pathen thu ingai uvin, tah-jong itahsanji nauvin, ahivangin imuchenthei pouvin, ihethem theiji pouve. Pathen hetchen’a tahsan’a neiding jong hi Pathen koma thum angaiye. John 6:65,…Chuin aman hiche jeh’a chu najah uva Pa peh louvin koima kahengah ahunglut theipoi, atin, hijeh chun Bible’a Pathen iseidoh ho’u leh eiho ngaito leh itahsan na ho’u hi Bible’a toh akito lou leh Tahsan Dihlou kiti ahitai:

  1. Jesu Thisan leh Chonsetna Danthu nit’a vangam lut dinga tahsan ho;
  2. Jesu Thisan leh Sabbath init lou leh Vangam akilut theipoi ti’a tahsan ho;
  3. Jesu Thisan leh Baptise akichan lou leh Chonset Ngaidamna aumpoi ti tahsan ho;
  4. Penpi chonset manna dinga Jesu Thisan leh kisihkit ding ahi, ti’a tahsan ho;
  5. Jesu Thisan leh sa naneh lou ding ahi, ti’a tahsan ho;
  6. Jesu Thisan leh eima Chonphatna jaolou in vangam akilut theipoi ti’a tahsan ho;
  7. Jesu Thisan leh Nu Mariam Palai khat’a apanlou leh vangam akilut theipoi ti’a tahsan ho;
  8. Jesu Thisan leh Pao-chom pao-chom neihi huh-hungna ahiti’a tahsan ho;
  9. Jesu min’a twilut hi huhhing na leh vangam lutna ahiti’a tahsan ho;
  10. Jesu’n eihuh-hing tauve, Thisan in ichonset najouseu asoptheng tai, inop-nop in chon jong leu hen ihinnau amang tapoi ti’a tahsan ho;
  11. Peter chunga ahoubung atundoh ahi, ti’a tahsan ho;

Lei mihem te’n Pathen itahsan nauvin hinlah eimaho dei-deiyin igel uvin ikikhutsan jiuvin ahi:

  • Atahsan kitoh jouse chu eimaho tahsanna in ikiloikhom uvin loupe tah leh thupi tah in ikiloikhom jiuvin;
  • Atahsan kitoh jouse chu Denomination khat ihisoh keiyun,; denomination khat ihiteng leh Thaneina chu ineiji tauve, hiti chun Bye-Law tamtah tah isembe-be’uvin ahi. Eimaho mission sehseh sohcha dingin igeljiuvin ahi;
  • Pathen minin Tahsan Thu isei sohkei uvin, hinlah mission khat-le-khat jong kihou thei lou chule tahsan na kiloikhom theilou ihisoh kei uve;
  • Bible in iti asei velou in eima ho tahsan na ho toh ikiloikhom uvin Pakai ihepha pouve;
  • Itahsan nau leh igunchu nao hi Mission’a ding leh Houbunga ding bou ahi’n Pathen in eihetphah peh pouve; thilpha ibol jouse’u hi Pathen in ei-hetphah peh louvu ahi. I Corinth 13:3,…Mijouse vahna’n kaneijouse toh jong leng Ngailutna kanei lou leh imacha kahipoi; I Corinth 3:10,…Abulhing chamkim ahung tengle akimlou chengse mangsoh ding ahi. Hiti hin Pakai Pathen in Tahsan Dihlou kiti chu hiti hin kaheng’ah ahin tahlange.

 

 

 

 

 

 

Thupi 11

TAHSAN DIHLOU HO HILCHET KHATNA

  1. Mikim khat in Chonsetna Danthu leh Sabbath akinit lou leh Vangam akilut theipoi, ti’n atahsan un hinlah Pakai Jesu’n Bible’a hiti’n aseiye, John 5:45,… Pakaiyin keima’n nangho Pa henga kaheh dingin ngaito hih un mikhat Mose nang ho’n nakineppiu aumnai ,ati. Hijeh chun mihing te’n Danthu anit joulou nau leh Sabbath Danthu anit joulou nau hi Mose john in Pa heng’a aheh ding joh ahi. Mihing te’n hiche Danthu hi koima’n ajui joulou ahi, tichu aphotchen ahitai.
  2. Mi kimkhat in Jesu Thisanlu tah in eisoptheng ta’n aban’a Sabbath kanit kitlou leh vangam kalut lou ding ahi, ti’a tahsan ho; Mathew 9:16,…Pakaiyin hitin aseiye, koiman pon sopnem loulai ahal in ponlui abeh ngaipoi, chule abehna chun apon chu aloiset joh ding ahi; chule mihem in lengpi twi thah savun penglui’a akhum ngaipoi, chute boll eh apeng chu atumkeh jin, atwi alongjal in apeng jong amangjin ahi. Ama vang lengpi twi thah chu a peng tah’a akikhum ngaiye, chute lebou min akihuhbit ding ahi.

Chule pon sopnem loulai ahal in ponlui akibeh ngaipoi ati chun avetsah chu ahileh, pon sopnem loulai atihin Thulhun Thah avetsah ahin, chule ponlui atichun Thulhunlui avetsah ahi. Pon luiya pontah beh ngailou atibanga, Thulhun Lui le Thulhun Thah hi akigom ngailou ahi. Lengpi twi thah peng lui’a akikhum ngaipoi atichu Thulhun Thah hi Thulhun Lui toh kihal theilou ahi, ti avetsah ahi. Lengpi twi thah chu peng lui’a akikhum leh penglui chu atumkeh jitai; hiche bang chun lengpi twit ah apom cheh cheh banga Thulhun Thah jong hi akhangtou cheh-cheh ahi. Penglui ati chu Thulhunlui aseina ahin chule atumkeh jitai atina chu akigom thei poi atina ahin, hichun Thulhun Thah hi Sabbath Danthu toh akigom thei poi, atina ahi. Hijeh chun Thulhun Lui leh Thulhun Thah hi angka (Calculation) kikhut henlang kisei leh Thulhun Lui hi akiladoh (-) ahi’n akiem suh-suh ahi. Thulhun Thah hi Lengpi twi thah (+) akigom akhangtou tou ahi. Amani hi ahina lhon jatchom cheh ahi’n kigom theilou ahi.

  1. Jesu Thisan in eilhatdam ta’n twi akilut kit lou leh vangam akilut theipoi ti’a tahsan ho:

(A)         Jesu Thisan hi Adam Chonset jal’a tonsot thina kona eisop’u ahin vangam lutna ahinaipoi;

(B)         Twi lut hi John chun lungheina ding’a anabol ahi, Mathew 3:2 Nalungheiyin vangam anaitai, ti’a twi analut sah ahi.

(C)         Pakaiyin twi alutsah hi tahsan na Baptise anabol in, hichu ama toh ithikhom’u leh ithokhom kitdiu ahi, ti vetsahna abol joh ahi. Hijeh chun Jesu Thisan leh Twi lut hi vangam lutna ahipoi.

  1. Penpi chonset mana dinga Jesu Thisan leh kisihkitna angaiye ti’a tahsan ho:

(A)         Thisan hi Adam Chonset thina kon’a soptheng na ahi’n vangam lutna ahipoi;

(B)         Kisih kit angaiye ti’a tahsan ho; I Corinth 13:3,…Kisih kit in tahsan in kanei jouse vaicha genthei tona’n neijong leng ngailutna kanei lou leh imacha kahilou ahi. Hijeh chun kisihkit na jong vangam lutna ahipoi.

(C)         Itobangin kisihna nei jong leu hen Jeremiah 13:23 Ethopia min avouso avun akheltheiya Lutnun ajempol hi akheldoh thei ham? Chuti leh thil gilou bol’a themsa nang ho’n jong thilpha nabol teidiu ahi. Hijeh chun mihem kisihkitna jong hi Pathen dinga thet umtah ahi.

  1. Jesu Christa Thisan leh Sa akineh leh vangam akilhung thei poi ti’a tahsan ho:

(A)         Jesu Thisan hi Adam Chonset Thina kona sopthengna ahin vangam lutna ahipoi;

(B)         Sathenglou nehlou ding, Act 10: 11-16,…Chuin vanna kon’a bom khat ponlhe lentah banga aningli’a tol’a ahung kikhailha amu’n, 12,…A-anga chun akengli sa-namkim leh tol’a vah ganhing chule chung’a leng vacha namkim aumin, 13,…chuin ahenga Aw khat baun gingin, “Thou in Peter kithan lang ne’n ati,” 14,…Ahivangin Peter in chute po’nte Pakai, ajeh chu keiman imatih chanin thilboh leh athenglou kanekha poi, ati, 15,…chuin aniveina in Aw khat ajakit in Pathen in asuhthengsa chu nangma’n aboh tihih in, ati; chuin hiti chun thumvei ahung umin bom chu vanna’h akhaitou kitta’n ahi.

Hiti ahijeh chun, sanamkim jouse Pathen in asuhthenga nehthei ahitai, ti vanna konin Pathen in ahinseiye.

  1. Jesu Thisan in eisoptheng ban’a eima chonphatna jaolouvin vangam akilut theipoi, tiho:

(A)         Jesu thisan hi Adam chonset tonsot thina kon’a eisoptheng peh’u ahi’n, vangam lutna ahipoi.

(B)         Eima chonphatna Bible in hiti’n aseiye; Ephesus 2:8,…Lungset man’a tahsan vanga huhhing’a um nahitauve, hichu nangho’a kon ahipoi, Pathen thilpeh joh ahibouve, ati. Job 15:14,15,16,…Mihing hi ija nabol’a athenga umthei ding hija numei sungpeng kiti chu adih’a umthei ding ham? Ve’n Pathen in amitheng te chunga jong ginchat aneipo’n, Ama-angsunga amitmu’n van jong atheng poi; chute ahile itobanga hot-le-kidah um mihing hi ichangeiya khoh jo’a themmona twi don’a don mihing hi ichangeiya khoh jo ding ham?

Hijeh chun mihingte chonphatna hi Pathen ang’a kidah umtah ahi.

  1. Jesu Thisan leh anu Mariam palaiya apan lou leh vangam kilut thei ponte ti’a tahsan ho:

(A)         Jesu Thisan hi Adam Chonset a kon’a eisoptheng’u ahi’n, vangam lutna ahipoi.

(B)         Anu Mariam palai ahiti’a tahsan: anu Mariam hi mihingte le Pathen kah’a adinna Pathen ang’a eiseicham peh nao Bible imacha akimu poi. Mihemte chonset ngaidam na dingin ima asei Bible’a akimu poi. I Thimothy 2:5 Pathen khatseh bou ahi, ama le mihemte kah’a Palai jong khatseh bou ahi; ama chu mihing ahin Christa Jesu chu ahi.

Mihingte chonset na jouse Pathen anga palaiyin ahung dingin, Hebrew 9: 15 Chule Lhagao Theng in jong eihettohsah nauve; ijeh inem iti leh, hiche ninunung ni le chun amaho toh kakitepna kaphudoh ding chu hiche hi ahi, ti’n Pakai chun keiman alungthim uva kachondan thu pengting chule alungsung uva kasut ding ahi, tin aseiye. Hiti ahijeh chun Pakai Jesu hi Pathen toh ikah uva palaiya hungpang’a hiche kitepna hi ahinbol ahitai. Nu Mariam hi mihing te’n palaiya ihisah thu’u ahin Mariam palai ahina Bible’a aumpoi.

  1. Jesu Thisan leh paochom-paochom tho hi vangam lutna ahiti’a tahsan ho:

(A)         Jesu thisan hi Adam chonset thina kon’a eisoptheng nao ahi’n vangam lutna ahipoi.

(B)         Paochom tho ho: II Corinth 3:8 Ngailutna hi imatih chan’a mangthah lou ding ahi; Lhagaothu seidoh vang chu mangthah ding ahi, Paochom hetjong chu mang ding ahi. Chihna le hetna jong chu mang ding ahi.

Hiti ahi jeh chun ngailutna ati hi Jesu Christa hi Pathen in eingailut nau ahin chule Jesu neijouse chu amangthah lou ding ati ahin, chule paochom het ho hi Pathen thilpeh ahi. Chihna le thepna ho jong Pathen thilpeh ahi. Pathen thilpeh jouse mangthah ding ahin Christa Jesu neijouse vang chu mangthah lou ding ahi, ajeh chu Pathen thipeh itihou hi leiset chamkim lou na mun’a achate’n amanchah ding’a apeh ahin, hichu vangam’a pohlut thei ahipoi. Ahin ngailutna vang manglou ding ahi.

  1. Jesu Thisan leh Twi lut hi vangam lutna ahitai ti’a ntahsan ho:

(A)         Jesu thisan hi Adam chonset thina ko0n’a sopthengna ahin vangam lutna ahipoi, twilut hi Pakaiyin tahsan na’a ithitha uva amatoh ithokhom kit ding’u lim’a abol ahi’n, vangam lutna ahipoi. Vangam lutna dingin Bible in nasei poi.

  1. Jesu Thisan’a lhatdoh kahitai, kahinna hi mang taponte, kanop-nop in chon jong leng mangthah taponge ti’a tahsan ho:

(A)         Jesu thisa hi Adam chonset thina kon’a asopthenga ahin Pathen anga asuhthenga ahitai. Ephesus 5:5,6 Ajeh chu Christa l;e Pathen gamsunga chu mijonpan, mithenglou, mipapse, milim hou hicheng chu imacha achandiu aumpoi, tichu kichen tah in aheuve. Mohthu homkeo in koima kilheplhah sah hih un hiti ho jeh chun thu’a nunglou chate chungah Pathen lunghan achujin ahi.

(B)         Hiti ahijeh chun Jesu Christa thisan’a ngaidam chan jouva chonset bol kiti hi Pathen lunghan na joh ahi’n vangam lutna dingin Bible in aseipoi.

  1. Jesu thisan’a eilhatdoh vanga Jesu mina baptise akichan lou leh vangam akilut theipoi, ti’a tahsan ho:

(A)         Jesu Christa thisan hi Adam chonset thina kon’a eisoptheng’u ahitai. Vangam lutna ahipoi.

(B)         Jesu mina twi lut (Baptise) hi Solchah(Acts) 2:32 Chuin Peter in ajah uva nalung heiyun lang chonset suhbei na’n Jesu Christa minin nabon Chauvin Baptise changun, chule lhagao theng kipe hi nachan diu ahi. (1) Judate hohin Judaism Dan thupi asah uvin Pakai Jesu ana sang pouvin Pakaiyin aseijouse hi Pathen demna leh aki-Pathen sah uve ti’a atahsan lou jeh uva Thingpel’a akhetbeh’u ahin, hiche jeh chun nalung heiyun ati chu Judaism akonin hung kileheiyun atina ahi. Jesu atahsan uva amamina baptise achan’u leh lhagaothen chang dingu ahi. Hijeh chun vangam lutna dinga asei ahipoi. Judate hohin Pathen jong atahsan pouvin Lhagaotheng vang atahsan uvin Jesu chu atahsan uva Jusu mina baptise abiol’u leh Apa-Acha-Lhagaothen thum Pathen chu amaho ding a lhung ahitai.

Hijeh chun Jesu atahsan uva, Jesu nung ajui uva Pathen  toh akicham uva Lhagao theng toh akiloikhom diu hi Pathen in adoipeh nao ahi.

  1. Mikimkhat hon Pakaiyin Peter hi songpi ahin hiche songpi chunga chun Pakaiyin a-Houbung atungin chule vangam chabi jong pei; Peter athikon in vangam chabi chu Pop pa apen hijeh’a chu Vangam Chabi hi Pop in achoi ahi, chule Houbung jong Peter chunga atun ahi ti’a tahsan ho: Mathew 16:18,19,…Chule keiman jong nangma jah’a kasei ahi, nangma Peter nahi, hiche songpi chunga hi ka-Houbung kasahdoh ding ahi. Mithikhul kotpin aneh joulou ding ahi. Keiman nangma Vangam Kot-heh kapeh ding nahi; chule leiset chunga nangma’n nakha chan chun vanna jong kikhah ding ahi, chule leiset chunga nangman nahon chan chu vanna jong kihong ding ahi.

Pakaiyin Peter nangma songpi nahi atin, Hiche songpi ati chu Pakai ama kikoh’a amachunga houbung atunding thu aseina ahi. Peter songpi hi alet le asandan feet 20 alen songpi ahi. Chule Christa Songpi hi aletdan asandan Feet 100 a len ahi; songpi cheh cheh ahivangin Peter songpi sangin christa songpi chu lenjo ahin, inn-sahna thei ahin, christa songpi chunga chu a-houbung atun ahi. Chule Peter kiti chu songpi tina ahin, Christa jong songpi tinama ahi. I Corinth 3:11,…Abul kiphutsa tailou chu abuldang koiman aphutdoh theipoi, chuche abul kiphu chu Jesu Christa ahi.

 

Hijeh chun Pakaiyin ama chunga chu a-Houbung atun ahin mithikhul kotpin jong ananjou lou ding ati ahin, hiche bang chun Pakai hi athi in nithum ni in thina’n jong henjou louvin ahung thoudoh tai. Hijeh chu mithi khul kotpin ananjou lou ding ati chu Pakai ama kisei ahi. Vangam Chabi Kot-heh kape ati chu Pakai in Peter hi Vangam chabi huhhingna thupha seina hi Israel le Juda sunga dinga Kipana Thupha seidinga atun ahi. Hijeh’a chu huhhingna thu aseina chan’a Vangam kot kihong’a aseilouna chana Vangam kot kikhah ahi.

 

Paul hi Pakaiyin vannoi chitin namtin henga Kipana Thupha seiding le Leng ho anga ding dinga atun ahi. Hijeh chun Houbungkiti hi Christa’n ama chunga atun ahin thildanga huhhingna dang aumpon tahsanna dang jong aumpoi.

 

Thupi 12

TAHSAN DIHLOU HO HILCHET NINA

Pathen Innpi sunga Pathen in abulphu chu Pakai Jesu Christa bou ahi’n, Pakai piputna leh Ama jaona lou chu Pathen in alahlou ahi:

  1. Pathen houna kiloikhomna Denomination hi mihingte’n ibolthu’u ahin Bible a aumpoi;
  2. Exodus 20:4,… Alim semthu nahou lou diu ahi, ati chu hiche ahi; Pathen i-hounao eimaho deilam cheh’a tahsan kiloikhomna denomination ibol jouseu leh bye-law isem jouseu hi alim-semthu houva Pakai in akoi ahi.
  3. Tulai khanga seidin amintin in mobile phone ineisoh keiye; hiche phone sunga chu thuseina balance hi akikhum lou leh ithusei chu phone’a achethei poi, achetheilou tobanga chu Christa lhagao ineilou leh Pathen toh ikihou theilou diu ahi.
  4. Bazar’a khun ahtui(Eggs) tamtah akijoh in, hiche ahtui khu ahpi i-opsah’a – lhathum changei ki-opsah jong leh anou akeo thei chom poi. Ajeh chun achalin amat lou jeh’a chu anou kijilna achi umlou ahi. Hitobanga chu Christain khat ihivanga Christa Lhagao ineilou leh Lhagaova kihing theilou ahi. Pathen toh kihoumatna umtheilou ahi.
  5. Mihing te’n jong eiho lhagao hi Lhagaotheng sohtheilou ahi. Christa Lhagao ineiteng leh Christa Lhagao chun Eiho Lhagao chu Lhagaotheng asosah ahi; Mathew 13:33 Numei khat in chol changbong denthum lah’a apom sohkah’a abil tobang ahi, chol chun changbong apepom’a aboncha chu chol aso ahi. Hiche banga chu Lhagaothen ichan phat leh hiche lhagaothen chun eiho lhagao chu Lhagaothen asosah ahi. Hiche Lhagaothen hin chunglam vanlam ajonin Pathen innung eilhut’a Pathen cha eiso ahi. I Corinth 13:10,..Abulhing chamkim ahung teng leh akimlou chengse hi kisubei soh ding ahi. Pakai amatah amite puiya ahung teng leh Pakai Lhagao neijouse chu ama lamton lengtou intin Lhagao neilouse vang mangthah ding ahi, tichu aseina ahi.

Houdan dihlou kiti chu thilpha hihen thupha hijong leh Lhagao pannalou Lhagao jaona louse chu Houdan Dihlou kiti ahi.

 

 

Thupi 13

Pakai Pathen Lunghan naho

  1. Semtil laiyin Sodom le Gommorah khopi hohi huh-le-jonthanghoi jalin Pathen alunghangin, Pathen lunghan achun kath-le-mei in asumangtai. Genesis 19:24,25,… Chujouvin Pakaiyin Sodom le Gommorah khopi teni chungah chun vanna konin kath meikong gojoh bangin ajuhsah in akhopiteni jong aphaicham geiyin akhopiteni sunga cheng jouse ahin tol’a kehdoh thingna louna abonchan asugamtai.
  2. Noah nikho laiyin vannoi mite hon Pathen ana sumil uvin juneh nopchon jeng anabol uvin Pathen lunghan achunguvah alhung tan thina twisang in asumangtai. Genesis 6:5,6,7,…Chujouvin Pakaiyin leiset chunga mihing gitlouna apunjal’a chule anikho ho’u alunggel alungput gitlou jeng ahi chu amudoh ta’n hijeh chun mihing anasem chu Pakai amatah akisih tai. Ijeh inem iti leh hiche chu ama alung sugenthei gunset in apangtan ahi. Chute jeh chun Pakai in jong keiman leiset tol’a kona kalah’a kasemsa mihing hi sumang atange, mihing ahin sahem ahin ganhing tol’a kithol ahiuvin chunga leng vachate ahiuvin, ajeh chu hichengse kana semdoh hi kakisih lheh tai, ati.
  3. Achan in chonset anabol in Pathen nin gaal thil suhmang dinga thupehsa polsil le sana le dangka alah jeh in Pathen alunghang in Israel pumpin gaal alel uvin amale a-innsungmi aneijouse toh suhmangin aumtai. Joshua 7:23,…Chuin amahon jong athil jouseu chu aponbuh sunga konin ahin podoh uvin Joshua leh Israel chate hengah ahin choilut tauve, hichun athilkeo ho abonchan Pakai angah asepkhom uvin ahi; Joshua le Israel mi pumpin Zerah chapa Achan chu aman uvin dangka ahin ponsil ahin sana lhon ahin chule achapate leh achanu chengse ahiuvin abongchal houleh asangan jouse ahin, akelngoi chengse le aponbuh geijin, ama thil le anei kiti poupou chu achomkhom sohkei uvin abonchan Achor phaicham’a ahin polut tauve; Joshua’n aseiyin, “Ibol’a nangman ichunguva lunggim hesoh hitobang nahin pohlut hitam? Tuhin nang chungah Pakaiyin lunggim hesohna hinpolut jo hen ati’n Israel pumpin Achan chu songin aseplih tauve, adang ho jong chu songin aseplih uvin meiyin ahalvam tauve.
  4. Saul gaal akona Pathen in suhmang dinga athupeh ho sumang louvin, ahin pohlut jeh in Pathen alunghang in a-Lengchan ahaisah tai. I Samuel 15:10,…Pakai thusei Samuel hengah ahung lhungin hitin ahungti, “Keiman Saul ka-Lengchan sah hi kakisih tai, ajeh chu ama akileheiyin keima eijuidan kathupeh chengse jong aboldoh tapoi, atin chutah chun, Samuel jong alunghang tan hijeh chun pakai hengah jaan khovah in atauve.

 

  1. Israel te’n Pakai Jesu asandau, a-Lengpau asanlou jeh un AD 70 in Jerusalem Temple alhun, asubei tai. Mathew 23:37,…Vo Jerusalem Jerusalem, Themgao ho that leh ahengsa kisol ho songas seplih ahpin anoute alhaving noiya a-opkhum banga keiman jong nachate ijatvei opkhum dinga kagot hitam? Ahin lah nangho nanom pouve. Veuvin na inn’u chu akamjil dinga, nang’u kidalhahpeh nahitauve. Ijeh inem iti leh kaseipeh nahiuve, Pakai mina hungpa Lengpa chu anunnome nati masangseuva tukal’a keima neimu lou diu ahitai, ati.

 

Pathen lunghanna hohi Manasseh chate’n Pakai Jesu Christa itahsan uva ikisan uva inampiuva ivaipohsah diu ahitai. Pakai tahsan’a kisan hi amimal’a dinga jong hinna damna hindohna ahi. Khosunga jong Houbung sunga jong Pakai chenna Pakai umna jouse damtheina le phatthei na ahi. Nampi’n jong Pathen lungsetna isanuva, Pakai jana noiya hinkho iman phat’u leh Pathen in eichoisang uva namdang ho sanga jong chihna thepna houna eipeh diu ahi. Kuki chate Manasseh chate chunga Pakai avaihom ta’n ibonchauvin kihet’u hitin, ilungsung Laltouna itousah diu, i-innsungu jong ama kijabolna hiding, ikhosungu jong ama chenna hiding, igamsung’u jong ama vaipohna hiding ahi; i-nampiuva Pakai vaihopna hiding ahitai.

 

Thupi 14

PATHEN CHU GONGTOH PA AHI

 

  1. Mathew 24:32-35,…Theichang phungin Thulem kihil un abah adon’a a-na ahungnou tengle nipi anaitai ti nanghon naheuve; Chutobang chun nanghon jong hichengse chu aboncha’n namusoh tengu leh anaitai,. Kotbul hunggeiya ahitai, ti heuvin; Keiman nangho tahbeh a kaseipeh nahiuve, hichengse chu aboncha aguilhun masangse’a hiche khangguiya mite hi manglou ding ahi, van-le-lei mang ahin keima thuvang manglou ding ahi.

 

Pakai Pathen vannoiya mijouse sangin Isrealte akhohsah pen nin amite ahungvil lai hin amiten anasang tapo’n ak-Lengpau nahipoi tin Thingpel’a ahin khetbeh tauvin ahi. Hiche jeh’a chu Pakaiyin Israel anungsun in nadalha tan ahi. Hiche phat chun Manasseh Chate hi Isreal pumpi toh achomkhen’a China Lengpa khut’a apehdoh ahi. Hijeh chun tun phat alhingtai. Pathen hi gongtohpa ahibang’a eiho Kuki Chate Manasseh Chate hi i-Pau Pathen in eiholdoh uva Manasseh Chate toh Christa Lenggam tungdoh dinga i-Pau Pathen thilgon ahibouve. Abah adon’a a-naa ahungnou tengle nipi anaitai, ti nangho’n naheuve, ati hi Manasseh Chate amangthaisa akisumangsa, agopsate tu’a Pakaiyin eihung holdoh uva, i-Nampiuva hungvaihom ding hi a-naa anou atichu ahi. Ajih-adon atichu Christa Leng-gam’a Pakaiyin sangtah’a Phatthei eiboh diu ahi. Vannoiya Leng-gam dang ho’n jong kidang asah uva, hijeh’a chu Hou dang ho Budhist ho, Mushlim ho, Hindu ho, amaho jong hin hiche Jesu hi Pathen jouse Pathen ahi, Leng-gam jouse jong ama Thaneina ahi, ahisahnom ahisah ahiti ahin hetdoh dingu; amaho chu hung uva keihon jong nang ho Pathen kahou diu ahi ti’a ahin houdiu ahi. Hiche ahunglhun nading chu ajih-adon atichu ahi. Hijeh chun Pathen in Israel mangsa Manasseh chate a-Thutep banga ahungso masangse’a Pakai hunglou ding ahi.

  1. Hiche jeh’a chu amitin in Mathew 6:33,… Amasa’n Ama gam leh Achonphatna hol masauvin chuteng hichengse hi nakipehbe diu ahi, ati chu hiding ahi. Mihing jouse’n Pathen i-holmasat uva Pathen jana noiya Pathen toh ikilhonkhom diu hi i-Pau Pathen deisah ahi.
  2. Khosung khat’a Haosa in jong masanglaiya banga ju-le-sa neh’a anop-nop’a vai pothei lou ding ahi. Pathen lungsetna noiya Pathen ahetlou leh Pathen in asuhmang ding ahi. Haosa jong Pathen hetna anei ding khosung mite chunga jong Pathen thu toh kilhon’a kingailutna leh kihepina toh vaihom ding ahi. Haosa jong Pathen mite chunga tahsalam vaipo’a kingaito lou ding Lhagaolam vaipo’a kingaito ding ahi.
  3. Service natong ho hihen lang ipoi lampi hijong leh natohna neijouse’n jong:
  • Pathen ihol masat uva Pathen inei uva, Pathen Danthu toh kilhon’a, Pathen jana noiya Pathen toh kilhon khom ding ahi.
  • Eiho Pathen’a ikisuhdih tengu leh Pathen in itohna lamlam cheh’a Phatthei eiboh diu eidopsang diu ahi.

 

  1. Milham chamlhat miho jong Pathen ihol masat uva Pathen inei uva Pathen ginna le jana noiya hinkiho imandiu ahi. Pathen Thu toh nakisuh dih’a Pathen jana-le-ngailutna toh nakilhon thei leh na-Innsunga chamna le lungmon leh Pathen houna chu nangding’a hungloupi ding ahi.
  2. Pathen anga hou –natong ho jouse jong hitihi ahi:
  • Chinghoi kaihoi ho jong mipengthah kicheh hiding ahi. Ephesus 4:11,…Chule Aman abang Solchah, abang Themgao, abang Kipana Thupha lhangsam, abang Chinghoi Kaihoi, abang Mihil hina apeh ahi; Hiche lhacha natong dinga mitheng ho pilhinsah na’a Christa Tahsa chu khantousah nading’a eiho Pathen Chapa Thudol’a ginchat Thahat ihiuva hetna inei uva mikikhenlhit ihiuva Christa pilhin lungchan iphah kahse’uva ding ahi.
  • Nupi Lamkai leh khangdong lamkai ho jong mipengthah tahbeh hiding ahi.
  • Houbung Upa ding jong mipengthah tahbeh Pathen Talent peh nei hiding ahi. Houbung sunga kin kipeho leh akimang jouse jong penthah jouva Christa Hinkho Theng’a jousa ho hiding ahi. Ajeh chu Pathen Atheng ahin, Pathen in jong hiti’a asei ahi. Ephesus 5:5,…Ajeh chu Christa le Pathen gam sunga chu mi-jonpan, mithenglou, mipapse, milim hou; hicheng chu imacha achandiu aumpoi, tichu kichenin iheuve.
  1. Inampi sung uva Nam Lamkai jouse jong Pathen he mipengthah hiding ahi. Alen’a pat’a aneopen’a natong lamkai jouse chu Pathen he Pathen jana noiya hinkho mang hiding ahi. Nam sepia lamkai jouse jong Pathen he hiding Pathen ging mihing hiding ahi. Hiche hi keisei ahipoi Israel Pathen inapui le’a hichangeiya eilolhin sah Pathen chun asei ahi.
  2. Ajechu vannoi mihing jouse sanga Lungsetna Chungnung le Hepina Sangpen’a eineiyu ahitai. Hijeh chun namdang jouse sanga Phattheina chung nungjo eipediuva ichung uva hung vaihom ahitah jeh’a eiho’n jong ama deile ama lunga eikilamkai sah uva i-Pau Pathen lam ikat jing diu hi Pathen Lunggot ahi. Piputna leh kinpohna neijousen Pathen ihet uva Pathen jana hinkho iman louvu leh Pathen lungsetna kithopina ichanthei lou diu ahi. Eimaho thahat le chihna’a chu imacha hithei lou ding ahi.
  3. Ju-lop sa-lop, tahsa nopsah na kimang jouse chu Pathen in imacha louva akoiding, ipi bol jong leh phachom lou ding, niemsuh-suh ding, akihetdoh’a akisih lou leh Pathen in asuhmang ding ahi.
  • Pathen hi isana athu akingai leh lungsetna gui tanlouva eipeh ahi.
  • Pakai ginglou, athusei i-ngaipeh lou leh Pathen chu kahvam-mei ahi.

 

 

 

Thupi 15

DOCTRINE OF BIBLE

 

  1. I Corinth 3:11,…Abul kiphutsa tailou chu abuldang koiman aphutdoh thei poi. Hiche abul kiphu chu Jesu Christa ahi.

Pathen innpi sunga Pathen in Jesu Christa gou abulphu ahi. Bible in hiti’a asei ahi, tihi itahsan diu ahi.

  1. Atahsan jouse chu Christa Kipana Thupha natong dinga Pakai na itohdiu ahi. Mathew 28:20,…Chule keima’n nangho kapeh thujouse hi aboncha anitdiuvin gahil un, chule veuvin Vanoi Leiset kichaini geiyin keima’n nang ho kaumpi jing uve.

Hiti ahijeh chun Christa’n Houbung ama chunga atuna Kipana Thupha natong ding’a kin eipeh’u ahi.

  1. Hiche Bible hi Pathen in a-Haikhum Pathen Lhagaotheng’a kon’a kisun ahiti tahsan ding ahi. 2 Timothy 3:16,17…Pathen in a-Haikhum Pathen Lekhabu’a Thu kisun chengse chu kihilna’a kiphona’a kipui jangna’a chonphat kisinsahna ding’a phatah ahi; Chuti’a chu Pathen mi chu phatchamkeiya thilpha boldohna lam’a chamkim keiya kigosadim’a aumtheina dingin.

Hiti ahijeh chun Bible hi itahsan uva athu ijui uva, athu’a inun phat’u leh Pathen mi ihinau kicheh ding ahi.

  1. Apa-Acha chule Lhagaotheng hi pumkhat ahiti’a tahsan ding ahi. Genesis 1:26,…Hiti chun Pathen in jong eihon eiho lim hin eiho tobang mihem semu hitin chuteng leh amaho chun twikhanglen’a Nga ho chung hihen, vanlaijol’a vachate chung hihen inn’a kivah thei ganchate hileh leiset chung hihen lang noi leiset chunga a-opma kithol chengse chung hijong leh thanei vaihom in pangu hen, ati.

Hiti ahijeh chun eihon eiho lim ati chu Apa-Acha chuleLhagaotheng pumkhat’a natong ahi.

  1. Jesu Christa hi amite latou dinga vanlaijol’a hung ding ahi. I Thessalonica 4:16,…Ajeh chu Pakai chu amatah Aw toh vantil pipu Awgin toh chule Pathen Sumkon gin toh kitho’a vanna kon’a hung kumlha ding ahi. Chutengle Christa’a athi ho chengse thoudoh ding ahiuve.

Ti’a aseihi amitheng te ho ahung kilahtou ding ahi, tihi tahsan ding ahi.

  1. John 14:12,…Keima’n tahbeh’a kaseipeh nahiuve, Keima eitahsan’a chun kathilbol chengse hi aman jong abolding ahi. Asanga lenjo jong abolding ahi, keima Pa henga kacheding jeh hin…

Hijeh chun koi hijong leh atahsan’a ahinna pumpi’a Pakai ngailu jouse chu Pakai thilbol theina ho leh asang’a lenjo jong abolthei ding ahi, tihi tahsan ding ahi.

  1. Chapa nei hin hinna chu anei ahitai. I John 5:11,12,…Chule hiche hettohsah na chu hiche ahi, Pathen in eiho hinkiemlou eipe tauve; Hiche hinna chu a-Chapa’a um ahi; Chapa chu neiyin hinna chu anei ahi.

Hijeh chun, tonsot hinna kiti hi Christa Lhagao nei hi tonsot hinna ahitai tihi itahsan diu ahi.

  1. Lhagao Theng chan hi thahatna leh lhacha natoh theina leh lolhinna ahi. Solchah (Acts) 1:8,…Amavang Lhagao Theng nachunga uva ahung lhung tengle nanghon thahat nanei dingu ahi; chule nang ho Jerusalem’a jong Juda gamsung se’a le Samaria chule leiset chung gam jouse’a kolmang geiya Ka-Thu hettohsah’a napan dingu ahi, ati.

Hiti ahijeh chun Lhagao Theng chan hi thahatna leh Pathen natoh kipatna soldohna ahi, tihi itahsan diu ahi.

  1. Christian te jouse hi Christa’a tahsan na pumkhat ihidiu ahi. Ephesus 4:4,5,…Tipum khat ahin chule Lhagao Theng khat ahi; hiche banga chu nakikou nau jong chu kinepna khat’a kikou nahiuve; Pakai khat Tahsan khat, Baptise chan khat ahi.

Hiti ahijeh chun Christa tahsan jouse hi mihing jouse leh Christa toh tipumkhat’a ihin diu ahi, tihi itahsan diu ahi.

  1. Pakai Jesu hi Leng jouse Leng Pakai jouse Pakai ahi. Philippi 2:9,10,…Chuche jeh’a chu vanna leiya leinoiya cheng jouse aboncha Jesu mina dilsuhna dinga chule Jesu Christa chu Pakai9 ahi tichu Pa Pathen Loupina dinga leijousen aphondoh nading’a, Pathen in sangtah’a achoisanga chule min chungnung pen ama apeh ahitai.

Hiti’a chu Pathen hi Pakai jouse Pakai, Leng jouse Leng ahitai, ti’a Bible in hiti’a asei hi itahsan diu ahi.

  1. Christa tahsan jouse hi Pathen toh pumkhat ihidiu ahi. John 17: 11,…Kapa Atheng eini pumkhat ihibanga amaho jong pumkhat ahitheina dingun nangman amaho hi hong in. H

Hiti ahijeh chun Pakai Jesun jong leiya ana lenlai’a pat’a atahsan jouse leh Pakai hi pumkhat’a iumdiuva asei hi itahsan diu ahi.

  1. Atahsante hohi melchihna hicheng hin ajui ding ahi. Mark 16:17,18,…Chule atahsan te chu melchihna hicheng hin ajuipeh dingu ahi: Keima mina thilha anodoh dingu, paothah paothah’a paodingu gul akhut’a adopsang dingu thina thei ima donjong leu ima tilou ding ahiuve; chule ana damlou chunga khut ngam leu ama chu damding ahi, ati.

Hiti ahijeh’a chu Pathen tah Christa neijouse hi Pathen in ama thilbol theina thaneina hohi apeh’a amanchah ahi, tihi itahsan diu ahi.

Hinkho kimanchah nading ho: Rome 12:1,2,…Chuti ahijeh chun sopite, Pathen lungsetna vang hin nati pumpiu chu longlhen thengtah gan kihing lha bangin Pathen lahtheidol tah in Pathen’a kipeuvin, ti’a kahil nahiuve; hichu nalung uva Lhagaova nahiunau ahi. Chule anang ho tulai vannoi leiset chon hin chon hih un Pathen lungdeilam hichu apha lahthei le phatchamkim hi ipi ahi nahetdoh theina dingun lungthah kengun lang limchom puvin.

(1). Hiti ahijeh chun atahsan jouse hi itipumpi ilungthim tahs ngaichatna hingkho thenga ikiman diu hi Lhagaova ihou na’u ahi.

(2). Ephesus 5:19,20,…Tumging toh thon la’n, houla’n chule Lhagao la’n kihoulimun, nalunggil un Pakai dingin kitohdel in longdil in laa sauvin;imatih chanin imalam jouse’a dingin i-Pakai Jesu Christa minin Pa Pathen thangvah jingun.

(3). Rome 13: 14,… Pakai Jesu Christa chun kivon jobouvun na-phe phatna dingun tahsan lam ngaichat suhbulhit ding imacha gohih un.

(4). I Peter 1:15,16,…Nakou pau athen bangin nangho jong nun-le-khan in thengun, ajeh chu keima kathen jeh hin nang ho jong thengun tin akisun e.

Hiti ahijeh chun atahsan jousen Lhagaova ilungpumpi kipana toh ama vahchoi ding ahi, tihi itahsan diu ahi.

 

 

THUPI 16

MIHINGTE CHUNGA HIN CHIHNA LI (4) AUME

 

  1. Jildoh Chihna;
  2. Bolthei Chihna;
  3. Hansan Chihna, chule
  4. Pienpi Chihna, hicheng li hi mihemte chunga aumin ahi.
  5. Jildoh Chihna: Bolthei chihna kiti chu mihing te’n chihna thepna ideiyun ingaichauvin hijeh chun chihna holna dingin lekha isim jiuvin gunchu tah leh tomngai jalin degree/title sangtah isimdoh jiuvin; hiche isimdoh hou hi jildoh chihna ahi. Hiche hohin ama ho dingin aphachomin a-innchen nading jong akisemin; innchen lou-chen nading phachom tah in akiboldoh juve. Amaho ding in aphachomin mipi le midang dingin vang ima aphachom poi.
  6. Bolthei chihna: Bolthei Chihna kiti chu mihem te’n thepna idei uvin, ingaichauvin hibang chun eiho bolthei thepna, carpentry ahin thihkhen thepna ahin inn sah thepna hijong leh gunchu tah in thepjilna inei jiuvin Pathen panpi najal in, thepna jong Bolthei Thepna jong inei jiuvin ahi. Hiche boltheina dinga jilna thepdoh na hi Bolthei Chihna ahi. Hiche bolthei nale chihna, ibolthei nalampiuva chun kivahna ding sumhol na’n inn-chen lou-chen ikisemthei uvin, hinkho’a kivahna lungmongin ineithei jiuvin ahi. Hiche thepna hohi ama dingin jong aphachom in ahi.
  7. Hansan Chihna: Hansan chihna kiti hi gamchom’a gaholdoh thei jong ahipo’n simdoh le jildoh thei jong ahipoi, apien’a pat’a Pathen in ahinpeh ahitai. Itobang thu hijong leh seingamna, gaal masang hijong leh hansan na hi pienpi Pathen peh ahi. Hitobang mi hi atohna lampi’a achal in ajouvin ahi. Amading in inn chenna behseh ahipo’n ahivangin mipi ding leh anam’a di’n phatchomna tampi aboldoh ji e. Hiti ahijeh chun, pienpi Hansan na ahijeh in Pathen in jong apanpi in atohna lam-lam’a jona ape’n ama dinga inn-chenna behseh ahilou vangin mipi dinga Pathen thilpeh ahi.
  8. Pienpi chihna: Pienpi Chihna Kiti chu penpi chihna ahin semdoh’a chihna le jildoh’a chihna toh akibang po’n ahi. Pienpi chihna kiti hi Pathen peh ahi’n thu itobang hahsa jong leh kang chakhat’a seikhen theina Pathen in apen boina le nohphahna ijat in tamjong leh kangchakhat’a gelkhen theina aneiyin, mipi dingin lungmonna Pa khat asohdoh in ahi. Hitobang chihna neihohi ama inn-chen na behseh ahipoi. Kiloset nale hoihamna aneipo’n, agel jouse chu chamna leh kipa lungmon’a ahiji in mipin jong kison na’a aneiyin, anampi dingin jong phatchomna tah asodoh ji e.

Mihon jong ama jal in kihinsona anei jiuvin ahi. Ama tah jong achena lam-lam’a kipana leh lunglhaina ahi. Mipi le nampi’n jong akineppi’n ahi. Lungmon nale chamna lampi ajot in ahi. Malai mi David te ho jong hi achihna jouse hi Pathen thilpeh ahijeh in tuni changeiyin Bible’a David chihna thusei ho amangthei pon leiset kichai tokah’a ama tobang’a ching hi umtaponte tin miching hon aseiyin ahi. Chuti ahijeh chun pienpi chihna kiti hi achungnung penin anampi in jong khinso na’n aneiyin ama dingin jong minthan na pachatna ahin inn-chenna behseh vang ahipoi.

 

Thupi 17

PATHEN CHU AMITE TOH AKILOIKHOM TENG LUNGLHAIJI PATHEN AHI

 

  1. Genesis 2;17,…Amavang se-le-pha hetna thingga khu naneh lou hiel ding ahi, ijih inem iti leh hiche khu naneh nini lhon leh nathi teitei lhon ding ahi, ati.

Hiti chun semtil laiyin Pathen in vanoi leiset asemin thilsem jouse asem jou hin Pathen in Adam le Evi chu Eden huon sunga ana koiyin, ama vang se-le-pha hetna thingga khu naneh lou hiel ding ahi, ijeh inem iti leh hichekhu naneh nini lhon leh nathi tei lhonding ahi, ati’n, hiti hin Pathen in amiteni thu ape’n, ana kiloikhom pi’n nilhah lam leh Pathen amiteni toh akiloikhom ji, Pathen jong alunglhaiyin ahi. Khonungin Satan pa’n ana lheplhah’a Pathen in nehlou ding atep aneh lhon tah jeh in Pathen alunghang in Pathen toh ana kikhen lhonin miteni chu Pathen thutep bangin tonsot thinna alhung lhon tai; hinlah thina sunga aumlhon hi ana kihet pouve.

  1. BC 1500 lai hin Pathen mihingte toh akikhenna asottan, Pathen in amite Israel te chu Egypt gam’a asohchan nauva konin Pathen in Mose akihoupi’n huhdoh nadi’n thil boltheina jat-som ana pe’n ahi. Pathen banthahat in ahin puidoh in gamthip noiya Exodus 20:1-17 Chonsetna Danthu Thusom chun ana kiteppi kit in, hiche hi phate cha najui ding kitup tah’a najui ding chule gamtep gam’a puilut dingin kitepna ape’n kum-somli sungin Pathen chun meilom in aumpin, jaan tengle meivah in aumpi’n neh-le-chah lhasam lou hiel in avah in Pathen chu amite toh akiloikhom in alunglhai tai. Khonung in Israel te’n Pathen thutep na ajui joulou phat in Pathen in Israel te adalha kittai.
  2. BC kichai hin Pathen chu amite toh kitepna hi anit jou pouvin hijeh’a chu Lungsetna Danthu ahinpo in amite lah’a tahsa-phe’n ahung pengin, amite sempha’a Israel tetoh lengkhom ding in ahungin tahsa-phe in ahung peng tan ahi. Hilah amite’n ana sang tapouvin thingpel chunga ahinthat tauvin ahi. Hinlah Pakaiyin ana toh akhel in tahsa lam’a akhutsan lou jeh un Lhagao lam’a huhhingna ape’n atahsan jouse Lhagaova pienthah na leh huhhingna chu atahsan jouse chungah Lhagao in semthah na pe’n Lhagaovin akiloikhom pi’n ahi. Amite’n akhutsan lou jeh in Pathen in Israel adalha’n AD 70 chun Jerusalem Temple alhu ta’n Israel te hi namdang te soh ding in apedoh tai.
  3. Tuphat nunung in Pathen in Manasseh mangsa eihung holdoh uva eihon jong i-Pathen’u ahi tichu ikihetchen uva ahuhhing na idopsang tengu leh Pakaiyin a-Lhagao hinbung lha’n tin hijeh chun Pakai lunglhai in tin, Pathen in tahsa-le-Lhagaova kiloikhom pi dinga Pathen in eihin neiyu ahitai. Hiche hi Pakai mina kasei ahi. Pakai Awgin ahi. Phat masa laiyin mimasa ho’n Pathen toh ana kiloikhomna hi ana dalha jongleu tun Manasseh Chate’n i-Pakai chungah kipah tau hite; Hiche Pakai hi ahuhhing akisan phat leh lunglhai ji Pakai ahi. Inampiuva huhhing na hi idopsang tengu leh tahsa-le-lhagao ani’a eisemphat dingu ahi. Pathen in athahat le achihna, ahousatna jouse hi itlou hiel’a mitmu tah’a eipeh diu ahitai. Tulai khanga gamdanga soh natonga sumhol ho jong ngatau hite. Gamdang ho housatna sanga Pathen in ahouna eipeh diu ahitai. Tun Pakai Manasseh Chate toh kiloikhom dingin Pathen lunggon chu guilhung ahitai. Eiho dingin i-Pakaiyu toh kiloikhom taute. Pathen hi maite toh akiloikhom teng leh lunglhai ji Pathen ahi.

 

 

Thupi 18

PATHEN IN ALUNGSET PEN LEH ADEI PEN

 

Israel in chapa som-le-ni aneiyin ahi. Acha som-le-ni lah’a hin apa hin Joseph chu achom beh in alungset in ahi. Genesis 37:3,…Israel in jong Joseph chu ateh nunga ahin-achapa ahijeh in achapa dang jouse sangin angailun hijeh chun sangkhol-chol bansao khat akhuipeh in ahi.

Hijeh chun Joseph hin mangkhat ahin neiyin Pathen in khonunga thil hunglhung ding ho anamu sah ahi’n, hiche hi asopi ho jah’a asei phat in, asopi ho’n apa’n achom lungset jeh a ana vetdau ana hin amang asei chu along himo tauvin, hichepa hi khonung tengleh eiho chunga vaihom ding kisa ahiti’n thadoh ding ahiti’n akihou tauve. Nikhat hi apa’n jong asopite ho gam’a kelngoi achin nauva anthah dinga achena’a hin asopi ho’n veuvin sangkhol chol ki-ah a mang neipa hungta khume atiuvin thadinga agot’u leh, Genesis 37:22,23…chujong leh Reuben chun ajah uva thisan sohih beh uvin gamthim laiya kokhuh sunga lehlut tauvin ati njeh’a achunga khutlha louvin asangkhol chol chu aholhah peh uvin kokhuh sunga alelut’u leh kokhuh chu ima ana umlou twi kannung anahi; ajingin Ismial sumkol veiho hengah sum somni in akijoh uvin Joseph jong Potipher khut sung alhung in ahi.

Joseph hi Pathen in ana umpin ama jong Pathen jana kitahna in hinkho amangin tahsa leh Lhagaovin akhangtou touvin nahi. Joseph hi tahsan um ahijeh in apupa’n jong innsung thil jouse’a aboncha’n Joseph angense. Niphabep jou hin Potipher jinu in jonpi dingin abonin, adah in aman in ahi. Joseph in ka-Pu innsunga thiljouse eingense’n nang hi eingense poi ati’n ajamdoh tai; Joseph kitah jal’in songkul sung alhungin Pathen Joseph hi chihna ape’n Lenggam sunga thilsoh ding Lengpa mangin amusah in aledohna Joseph ape’n, Pathen in Joseph hi Leng Inn-pi sungah aminthan sah in achoisangin atousah tai. Vannoi leiset kiel-lhah nasat jeh in asopite ho jouse ama khut sung ahung lhungin, aneolaiya asopi ho’n avetdana’u jaan mang chu aguilhungin; thina ding kiel-lhah na konin asopi jouse kihinsona leh hindoh na’n aneitauvin ahi. Hichete hohi vannoi leiset kiel-lhah ding Pathen thilgon jeh’a Jacob cha som-le-ni lah’a Joseph chu alhendoh’a amite kihuhdoh nadinga Pathen thilgon ahi. Hijeh chun Joseph chapa Manasseh te jong hi Pathen lungset chom ichan’u ahi. I-Pau Joseph Pathen anga-akitahna hi asuhmil lou jeh in Israel pumpin Pakai anasan lou nunga Manasseh chate hi eichom khen uva Christa toh a-Lenggam nungtundoh alungsetna sangpen’a a-angsung nom’a eikoiyu ahitai. Chuti ahijeh in Kuki Chate Manasseh Chate’n hethemu hiutin Pathen’a kipah-thanom’u hite. Pathen lungsetna ihetthem lou leh a-Lunghan na ichandiu ahitai.

 

Thupi 19

JOSEPH PHUNGA MANASSEH CHATE KHANKHO

 

Pathen in Israel Lenggam asuhmang nung hin, Pathen in China Lengpa thu ape’n, China Lengpa jong ahungkon suh in Israelte midang jong jaolou in Manasseh Inn-sungmite aboncha’n soh dingin ana kichohsah in AD 75 chun Kulpi inalhung tauvin; kitup-tah’a Kulpi sunga chu Lengte na itoh’u ahi. Hilai chu Lekha umlou lai ahi’n, Savun-jol’a chun Sabbath Danthu kisunna, hichu phatah’a ana jui’u ahi. Juda Dan chu i-Pathen uvin ana deilou jeh in Lengpa aselmang sah in AD 500 lai hin Danbu umtalou, thumelchihna um talou ahijeh in Israel ihiu jong hetalou, ipimi ihiu jong hetalou ahitauve. AD 700 lai hin i-Pathen’u jong hi ahinkhel’a Isreal Pao chu eilahmang peh uva, tu’a i-Pao nau hi eipeh’u ahitai. Abangin tu’a i-pao’u hi Thadou Pao atiuvin, hinlah Pathen in Manasseh Pao’a eipeh’u ahi. AD 700 jouva pat’a Kulpi sunga Pao eikhel peh uva, ilimso-imelput’u jong Israel mel hitalou, ivou-so’u jong akang ahitai. AD 1000 kichai hin Pathen in China Kulpi’a kon eihin puidoh uvin, ahung kitol’u hin amakaiya pang Chongthu chilhahte hi ahung lamkaiyin, anaopa Songza chilhah se hi gaal-nung-khah in ahin juiyin tu’a Kachin gam’a hin Kachinte aumsah in Upate hi Irawadi noilang Mngjang Pakhupko kitilai mun’a ana chensah in ahi. Nungin Chindwind pang ahin lhut uvin, hilai phat chu AD 1200 ahi. Chindwind apa’n Manipur, Assam changeiyin ikithe-thang tauvin i-Pau van Pathen gaosap na noiya um ihijeh un gamkhat-le-gamkhat akikhel in Pao jong achom jepjep in akikhel in; hijeh chun iumna gam uva imangthah soh tauve. Khonungin i-Nampi chung uva jong minoisena le vetdana ichangsoh tauve. Leng-le-Lalte vetda ichang tauve. Achomlam’a seiding in Nampi genthei thoh leh kaana natsat jeh’a Nampi Taona Pathen in asanjal’a anam mite ihiu eisah uva; Kuki Nampi asan’a Pathen khut sunga lhung lhu8ng ihitauve. Nampi sunga chamna hungum ahitai.

Genesis 48:19,…Ahivangin a-Pa anomdeh po’n keiman kahenai kachapa, ama hi nampi Nam khat hunglhing intin len jong hunglen ding ahi, ati chu guilhung ahitai.

 

Pathen natohna ho:

  1. Manasseh Chate hi China Lengpa eipedoh tauve;
  2. AD 700 lai hin Israel Pao alamangin tu’a ipao nau Manasseh Pao hi eipe tauve;
  3. Imelput’u leh ilim’u jong eikhel peh tauve;
  4. Juda Hou jong eilahmang peh tauve;
  5. Christain eiso phat’u hin Pathen in Manasseh Lenggam Christa Lenggam hi pathen in ahin bulphu ding hi Pathen thilgon ahibouve;
  6. Hiche hi eiho thahatna jong hilou ding ahi;
  7. Vannoiya Lenggam jouse tungdoh-Pa Istarel Pathen Thahatna hiding ahi;
  8. Awhe! Manasseh Chate’n hiche Pakai Awgin hi ingai uva, a-Thu’a inun’u leh Jerico Kulpi achim banga i-chung uva Pathen lunghan naho leh boina’n eitom’u Kulpi jouse Chimlhan ti’n, Pathen angsunga i-din diu ahitai.

 

 

Thupi 20

PATHEN THANGVAH NA LEH KIPATHU SEINA

 

Keima, Rev. Chomlhun, milhasam pen leh chihna neilou pen hijong leng Pathen in acha’a eisem’a eikouna kana chan jeh in Pathen kathangvah e.

  1. Masanglaiyin Pathen mite Egypt gam’a asohchan laiyin, Pathen in amaite huhdoh nading in Mose chu ana kouvin, Pathen in, “Nakam chu koisem ham?” ati’n, Mose chu ana kihoupi’n; lungneo louva hansan na aneina dingin Pathen in Mose ipi nachoi em ati’n Mose’n jong Tenggol kachoiye ati. Chuin Pathen in natenggol chu lehlhan atin alelhah’a ahileh gul asoh in Mose jong akichan ajam leh Pathen in jam hih in ameiya chun manin khaisang in ati leh, Mose jong hiti’a chu abol’a ahile gul chu tenggol anungso kittai. Hichun Mose jonf ahung hangsan ta’n, Pathen bol in ati-ti chu akibol’a ahile Pathen in na ahintoh ding ahitai, ti chu atahsan ati. Pathen Thupeh chu Pharao Lengpa angah alutngam tai. Pathen in Thilbol theina jat-som ape’n Egypt miten Pathen lunghan na gimbolna jouse amuvin athoh uvin; aban-banin athoh uvin ahi. Israel te’n jong Pathen chu ipi ham, tiobang ham, ti ana hepouvin ahivang in Pathen in amite chu athahat leh athil boltheina’a amusah nom ahi. Chuche thilbolthei najal chun Israel te’n a-Pathen’u ahetdoh uva amitmuva a-Pathen’u achunguva athahat chu amuchen-ahetchen jou uvin Pathen in Lhatdoh na’n Pathen thahat na’n ahin puidoh tai. Amite sohchanna kona puidoh nadingin Mose ana mangcha’n ahi.
  2. Semtil laiyin vannoi leiset kielpi lhah ding jeh in Pathen in amite Israelte kihinsona ding leh amite chingtup-vetup dingin Joseph chu amangcha’n ahi. Joseph chu Pathen in gim-genthei athoh ding jong ahetsah in amite ahuhdoh ding jong Pathen in aseipehsa ahitai. Hiche banga ama bang-banga natoh molso-mi ahi.
  3. Tu-phat nunung hin Pathen in eikihoupina loupe tah chu kachangin ahi. 1990 kumin nilhah khat khosunga damlou ho taona manpeh dinga kachedoh leh leitol’a hin Pakai hi kakom’a ahung dingin hiti’n eiseipeh in nahi, “Namin hi ‘Chomlun’ hitalou ding ‘Chomlhun’ kiti ding ahitai, chule na-Inneipi’n oisunga umkhu lhani alhing tai, apien phat leh amin chu ‘Joseph’ nasah ding ahi. Joseph in amite akihinsona dinga kamanchah banga nang jong kamite kihinsona dinga kamanchah ding nahi, ati’n; hiche hi Pakaiyin eikitep pina ahi. Sumil louva namelchih jing thei nadinga nachapa min chu Joseph a naminsah ding ahi, eiti. Hiti chun Pakaiyin kitepna abol hi kati aja’n keihi imacha bon kihilou’a kati’n, chingthei tah leh tompan in kahin chepi’n chu’a pat in Kuki Chate Israel mangsa ahi, tichu eipuidoh ji’n, eimusah ji’n, aban-banin thil jouse hi ama’a kon’a eimusah jeh’a ken jong hangsan tah’a kahin seiya, akisei bang-banga Pathen in na atoh’a Pathen vaihopna hi ichan tah jeh uvin Pa Pathen chu thangvah in um hen!

 

 

Thupi 21

IPI DINGA PATHEN IN MIHING ASEM HAM?

 

  1. Pathen in semtil in muthei-le-mutheilou chule hetthei lou thil tamtah asemin, ahivang in Pathen alungkim po’n ahi. Pathen te akihou un Genesis 1:26,…Eiho’n eiho limin mikhat sem’u hite, ti’n akihou uvin Pathen in mihing hi ahin sem hin Pathen jong akipah in ahi. Nilhah lam teng leh Pathen chu amiteni toh alengkhom ji e. Athilsem jouse lah’a Pathen in mihingte toh akiloi khom theiye.
  2. Ipi dinga Adam leh Evi lheplhah na lhathei ham? John 8:4-11,…Jesu’n ajah uva nalah uva chonsetna neilou pen-pen in amanu chu songin sep masa pen hen, ati; chuin akun kit in akhutchal in tol ajih kittai…amaho’n hiche thu ajah phat in alenpen’a pat in alhum geiyin apotdoh tauve. Pakai Jesu’n akhut’a tol ajihna ajeh chu hiche leiset’a kiladoh’a kisem mihing’a hin thungaina leh chonphat na aumpoi, ti’a akhutchal’a tol ajih’a chu achonset nau jouse akihetchen doh tauvin, Pakai Jesu’n tol ajih uva pat chun alungsung uva achonset jouse’u akihetdoh tauve.
  3. Hebrew 9:27,…Chule mihingte dinga khatvei thi’a chujou teng leh thutanna hungum dinga gotsa ahi, ati chu, hiche jeh’a chu Pathen in mi athi ding chu a-it jeh’a a lhagao chan sah’a hinsah dinga agot ahi.
  4. Chuti ahijeh chun Pakai Jesu’n John 3:5,…Tahbeh’a kaseipeh nahiuve mi koi hijong leh twi-a leh Lhagao’a athah pen lou leh Pathen gam alothei poi ati chu, hiche ahi. Mihing Lhagao hi PathenLhagao sohthei lou ahi. Hiti ahijeh’a chu Pathen Lhagao ati chu Christa Lhagao ichan phat leh Christa Lhagao chun Lhagao Theng eisosah ahi jeh’a asei ahi. Hitihin Christa Lhagao ichan teng leh Lhagao khat kihi tha’a Pathen hina kichanga Pakai lunglhaina dinga asem ahi.

 

 

 

Thupi 22

NGENSE NALEH GAHCHAH NA

Pakai Pathen Israel Pathen chun amite chunga Kulpi bangin akisong in Manasseh Chate chungah ahung tou tan hiti hin aseiye, Inn thah sahna ding khumphuna ding katetoh in, innpi ding avai feet 18, adung feet 20, kate in chule, anhon na ding avai feet 9 leh adung feet 30 in katedoh in, sambuh (varandah) ding in avai feet 10, adung feet 30 katelai hin Pakai Thusei ahunglhung in, nang in na-Inn ding natetoh’a nahoptoh banga chu kei jong hiche Bible’a hi Kathu kasut ahi. Hiche Bible’a hi mihing jouse chonset thina kon Jesu Thisan’a soptheng na ahi’n, Jesu hi Tonsot Hinna ahi, ti kisun ahi; hiche Bible’a hi Mihing Chapa kidomsang ahi’n Jesu Christa leh Lhagao bou kibulphu ahi. Tahsan na ding adang aumpoi, ‘Doctrine of Bible goes to Christ’ ahi. Kathu hi nang ho’n nadei-deiya nahei theilou diu ahi. Hiche Bible’a Jesu Christa leh Lhagao bulphuna hi asanglou leh anilkal aum leh:

  1. Acha deipen katha peh ding;
  2. Aniveina anil nahlai leh aji katha peh ding;
  3. Athumchan na anil nahlai leh ama kasuhmang ding ahi.

Manasseh Chate dou jouse ken kadou ding, Phatthei boh te, Phatthei kaboh ding ahi.

Masanglaiyin Israel in eina sangpo’n tu’n Manasseh Chate toh kiloikhomna kasem ahitai. Hijeh’a chu Pakaiyin phatthei eiboh diu chu Isiah 54:12-15,…Keima’n na-Inn tingvum kitungdoh jouse Songmantam’a kasem’a, na kelkot jouse jong songdul’a kasem ding chule, napal jouse’u jong chu songmantam cha-cha’a kasem ding ahi; nachapate abonchauva Pakaiyin ahilding, nachapate nasa tah’a hung hao ding ahiuve. Nang jong adih’a nakiphudet ding bolgenthei na gamla tah’a nadalhah ding ahitai. Ijeh inem iti leh nakichat kit lou hiel ding ahita’n ahi. Tijatna kon’a nagamlat ding ahi, ajeh pentah chu hitobang chun nahin phah lou ding ahitai. Mikhat touvin kitomona asemdoh’a ahile hiche chu keiya kon’a ahipoi, koi hijong leh nang toh kitomona semdoh chan chu nangma jeh’a kipal-lhu ding ahi.

Hiche Bible chang hi Manasseh Chate chunga dinga ana sei ahitai. Pakai Pathen hin Manasseh Chate chunga hi hungloupi ding ahita’n, vannoi mite’n Tonsot Pathen ahiti ahin hetdoh ding’u hiche Pathen hi Lungset naleh Ngailut na achamkim’e ti’a ahin hetdoh ding’u, keiho’n jong nang ho Pathen kahou diu ahi, atiuva ahin houdiu ahitai; hiche jeh chun Kuki Chate Manasseh Chate’n ‘Pakai Awgin’ ijah uva i-Pathen’u kin ibol sohkei diuva, ama toh kiloikhomna hi hung lhung ahitai.

 

Thupi 23

THUCHAINA LEH HETSAH NA

‘Pakai Awgin’ kiti hiche Lekhabu hi sunding in kaki-gong in, ahivang in aban’a Thupeh chu ahung kit lou jeh in, ken jong ipi’a kapat’a iti kasut ding ti kahepo’n, lhathum sungin lungdongin kaumin, inn sahna dinga khombul (foundation) kasem toh pat hin Pakai Thusei ahung lhung kit in, “Nangin innpi ding leh an-honna ding chule sambuh ding ti’a natetoh bang’a ken jong hiche Bible hi Ka Thu kasut ahi. Nathi nau leh na chonset nauva nahinna ding’u chu kasut ahi; Asunga tahsan Thudang aumpoi, Ka Thu hi nang ho dei-deiya nabol theidiu ahipoi; chuin Pakaiyin nachapa Lunkhothang jong TB natna thi ahipoi, thungailou jeh’a thi ahi, thungailou kitihi thina ahi, hichu hechenvin lang hiche ‘Pakai Awgin’ hi na-Nampi uva nachepi tengu leh keijong na-Pathen’u kahina hi neimu diu ahitai; asunga kisun Damtheina, Phattheina, Haothei na, na-Nampi chung uva kahin bohlhah ding, na-Pathen’u kei toh ikiloikhom na’u hi nahin chepi teng’u leh Leng jouse jong Thu Kapeh ding ahi. Nachung uva Leng jouse’n Lungset na na chung uva ahin pohlut sohkei diu ahi.” Pakaiyin hiti hin, “Nachapa Thungailou jeh’a hiche ‘PAKAI AWGIN’ Thu ngailou jong jepna kapeh ding, angaikit lou leh kasuhmang ding ahi,” ti’a ahin seiphat in ken jong kalhi-kanap pum’a kahin sutdoh ahi.

******************AKICHAI TAI************************

 

PAKAI NATOH PHONDOH NALEH SALAM

Nampi chunga Pakai apanlou leh kaana leh manthahna ahi:

  1. Pakaiyin Kuki Nampi Taona “Kasang Tai, Lhangtin Moltin’a kaana leh maona aw kajatai,” ati’n, “Na Nam mite hengah seita’n,” ati.
  2. 2011 kum in Kuki Nampi sunga kahin lhun in Pathen in nampi sunga kidouna-kithana asubeita’n ahi;
  3. Pakai Thupeh bangin Nagaland, Ahthibunga eisol in Maicham’a chun, Pathen in ‘Nam Thulhun’ eipe’n, Ama Thupeh bangin kachepi kit in, 2012 chun kachaiyin; Kuki nampi chunga gaosap na jouse “Katol mang peh tauve,” ti, eimusah in ahi;
  4. 2013 in Pathen in Nampi Lamkai jouse ahin loikhom in ‘Manasseh Chate’ ihinau akicheh sah ta’n ahi;
  5. Pakai Thusei ahung lhung kit in ‘Pakai Awgin’ hi i-ngai sohkei uva, Pakai toh ikiloi khom diu hi Pakai Lunglhai na ahi; abul’a pat’a eihoupi’a eisol-pa Pathen chun a-Thu kammal molso Pathen chu Kathangvah e.

 

 

Pakai Lhacha leh Pakai kamsang,

Keima Rev. Chomlhun.

 

Dated: Molnom,

The 20th July, 2015

Advertisements