Kukite Kichendan dihlou Tamtah um

ngambom2

Photo: Ngambom & Wife at their wedding ceremony

By Paolen Kuki

Numei pasal kichenna hi Pathen thilsem holah’a thil loupe tahkhat le vangboh channa bukim leh hamphatna chungnung khat ahi. Lhangphong’a dantheng’a kichengdia pan hinla hohi Pathen phatthei boh chang chungnung jep ho ahiuve tithei ahi. Chubanna, kichen nunga aji jana pe’a hinkho thenga hinkho mang jing hojong achonchan thenga kon’a asempa/apepa Pakai vahchoi ho ahiuve tithei hikit ahi.

Ajinei doh numei in jong amajon te angsunga anunnem’a ateh-akhang ajabol’a ajipa sopi ho jong angailut sohkei’a chondan dih le thenga pu-le-pa dan toh kitoh’a achon teng leh achon lamlhah dungjui cheh’a asempa Pathen avahchoi ahi. Numei pasal kichenna hi dantheng hihen lang kiguhjam thudol hijong leh agildan leh aloupi dan hohi atepi ding beihiel kit ahi.
Numei koi hileh amajonna angsunga ateh-akhang jalou’a ajipa sopi u-le-nao ho lungset lou numei chun anungsang ajoh keo hilou’a asempa Pathen jong anoise’a a-engkal tina ahibouve. Mou phalou chang khate vang chu akitoh te jong gaal’a kibolto jeng ahikit uve. Insunga mou ho achih uva aphat uva ahile ana kitohmo jing insung jong asuh toh uva chule ajile asopite jong akicham sah’a akilungset sah thei ahi e.
Mou hi’a amajon insung kholai dunga pouva joh thang thei numei hon vang amajon insunga gaal-le-tol asemdoh tei in ahi.
Numei leh Pasal chu ahung kichen teng lhakhat sung beh ajipan aji/in dalha louva aumpi’a ahileh inchen vangphat naleh kilungtona aneitei lhon’e tin golui mihon aseijiuvin ahi—hinlah itobang mong am tivang experiment kibol’a kihe aumdeh po’n, ana hesa tehse ho’n vang he maithei’u ahi.

Nupa chu akichen teng leh ajipa hihen ajinu hitaleh aji chu leiset chunga di’a agolpha pen khat’a akipom jeng ngai ahi. Chule lunggel jeng jong khat joh in imajouse ama thu-thu bou hiding adei khah’a ahile nupa kah’a kitomona apeng doh jeng jin ahi. Akoijoh lunggel hita jong leh 50-50 a achohal lhon’a hiti’a chu kilungtoh tah’a apha chacha ho chu achepi lhon ngai ahi.

Nupa chu akichen teng leh ajipa hihen ajinu hitaleh aji chu leiset chunga di’a agolpha pen khat’a akipom jeng ngai ahi. Chule lunggel jeng jong khat joh in imajouse ama thu-thu bou hiding adei khah’a ahile nupa kah’a kitomona apeng doh jeng jin ahi. Akoijoh lunggel hita jong leh 50-50 a achohal lhon’a hiti’a chu kilungtoh tah’a apha chacha ho chu achepi lhon ngai ahi.

Pasal hihen numei hi jong leh ji anei ding ham ahilou leh anei nikho’a pat ham’a kona chu masang anungah-agollhan lai’a ahinkho mandan chu avel’a apohdoh tahlou hiel ding ahi. Masang achondan ho chu ajineina apohdoh a, ahilou jong leh agollhan lai’a ju adon ngei banga adon kit’a ahile, chutobang pum’a hung khanglen insung chu adamthei pon, inchen vang jong aneithei pouvin, ipi ham khat’a lhahsamna khat aneitei jiuvin ahi.
Insunga tehpi ham, ahilou jong leh mounu ham chu adihlou aphalou lam’a engsetna toh akitho’a akaleh lam’a akipei jingkei’a ahile hiche insunga chu inchen phatna vang umthei lou mong mong ahi. Numei in amajon akikhohsah ding chutobang ma chu pasal in apute lang akikhohsah ding ahi. Chuti lou’a numei in anungsang aguhkhohsah jing’a ahile ajitoh inchen sem lam’a akitoh thei pon ahi.

Nupa chu numei ham alunghan teng leh pasal pan jong thip beh’a angeipeh’a, ahilou le pasal pa ham alunghan teng jong leh ajinun imacha sei lou’a thipbeh’a angai’a ahile kilungset na leh kikhotona apung chehcheh in ahi, ahinla akalval val’a thuse thungeilou le ham thanghoi ho aseidoh ho chu phasah peh ding tina vang ahideh poi. Hiche thu ho jouse iseilo nau jeh hi ahile insung adam leh veng sung nom ahin, vengsung adam leh khosung dam. Khosung adam leh gamkai sung dam’a gamkai sung adam leh nam jong dam ahi.
Alhang pi’a Thadou-Kuki ho hi insung boina neilou khatcha jong umlou ahi kiti leh dih maithei ahi. Insunga kivahpoh dan, kihil dan, maicham semdan holeh kichendan, kipuihuoi dan ho adihlou jeh in lungneo, lungthimset, engset leh gitlou na lungthim aumdoh jin society sunga jong khantouna sang in minsetna leh khansuhna atamjo jin ahi. Moral councilling hi Bible thuhil toh kitoh’a kihil jing’a jui jing ding aphan ahi.

Moral councilling hi Bible thuhil toh kitoh’a kihil jing’a jui jing ding aphan ahi.
Kichen thudol holeh, numei man kilah dan/kikhum dan ahilou leh dantheng lou’a kicheng ho chungthu kitan dan hijong leh akalval val’a kisotona atamtan ahi. Achanu’n adei angai jeh’a ajuot khat jong gucha tolthat michom ho bangin gihna leh gaapna sang tahtah aumdoh jitan ahi. Ada-da’a kigu doh’a kichenpi thudol vang achom ahitan, anopna insung dalha numei hohi, ajiten kihouna dungjui’a suhkhel anei ham, ajalou jeh ham, tingal lou kihou sanga sang tahtah a kigaap tona ding behseh aumpon, hiti hohi asempa Pathen a dinga douthei hilou hiel maithei ahi.

Masang jep chun numei khat leh pasal khat ana kicheng lhon in, numeite hi vaicha, pasalte chu housau ahi. Numeite avaichat jeh’u chun atehpi uvin amounu chu anoise in, abolgenthei jingtan, phatkhat chun numeinu insung miho kholai lenga ahung nauva chun atehpi chun amounu chu ainkote angsungtah chun nachanu’u hi Crore khat’a da ding hijong leh khoh kasapoi, atin noise tah in ahouseuvin ahile, amounu insung mite jong ajahchauvin athangtom uvin atibang bang tah chun abolsah uvin ahile akisung gepdeh uvin anei-agou jouseu jong achan lo uvin ahi.

Hitobanga kivaipoh insung jong hi society sunga zong-eh vadung bang jing nalai dan ahi. Gam sunga Pathen thu hunglut kal’a kum 100 lhinna Cerntanary kimang gam ta, ahivanga society sung insunga phatna Pathen deidol’a pengdoh thei atamjo tobang um nalai dingin ginchat aumin hiche hi jachat umtah khat ahi.

Tulai inam sung uva ichondan hou leh Pathen thu’a Centanary iman’u hi ivetkah leh jachat umtah ahinalai e. Masang lai’a missionary group khat thinglhang kho’a Pathen thu sei’a acheu leh khosung miho chu keotol (naked) a ana um nalai’u, ama hojong kum lhun langa hiche kho’a chu kimangcha dinga achekit nauva chun, hitin abol uvin ahi: ichenau khomi ho akeotol’a um nalai uva eihon sangkhol toka kichen pum’a icheu hi amaho dingin anop thei pon jahchauvin te atiuvin, khopam alhun un sangkhol-toka akisut uvin khosunga Pathen thu seidia agalut uleh khosung miho chu ana kihambol uvin abonchauvin sangkhol-toka in ana kivon tauvin ahi. Hinlah missionary ho chu akeotol uvin agalut man uvin ahile akisuhjum lo tauvin ahi.

Hitobanga chu Pahten ihou uva kum 100 lam lhinna centenary iman uva hibangse iso jeng vangu chun insung kipuihuoi dan ho adih nailou jeh in khosung Houbung sung leh gamsunga kivaipohna hihen kichen thudol kipui thudol, mankhum thudol hijong leh asuhsah aumnaipon jachat umtah tah leh melse tahtah pum in Pakai Pakai iti jing nalai uvin ahi.

Imguh khat, guh’a nehguh ham, guh’a thilse ham, gitlouna ham khat iboldoh iewmguh pum’a Pathen ihouvu hi Pathen in akidah ahi. Hitiho pum’a Pathen ihouvu hi Pathen ihouvu ilouva igitlou nau, ijon nau, iguhchat nau hojoh hi Pathen a inei u va ihou joh’u ahibouve. Ipi ham khat guhbol pum’a Hou in sunga lamkaipi lamkaipu ihinau pum’a Pathen ivahchoi’u hi Satanic hina joh ahi. Hijeh’a chu imalam jouse’a ithen dingu hi Pathen in eikounau ahi.

Epi i-ati leh Kuki te ikichen ni’u leh demand letter ikipehto pai uva hicheni or khocheni leh dangka(Money) hijat, Sel (Mithun) hijat dah hijat Date hicheni leh soilou ding, hiche nia nahung soi uleh ikitham diu ikibol diu ahi kiti a order agan nathei penna thu kiseiji ahidem, tihi gelthuh jep ngai in kahe’n ahi. Hiche hohi epi ebol nau ham? Hiche hi Kuki Christian te Culture mong mong ham? Migam kai ejat hamkhat machun vohchal (pig) tuh nga thamasat ding chujou leh achungthu u kisei ding bep hinalai.

Hitobang custom and culture inei ho’u imanthem lou jeh uvin kichen(marriage) hi insung ni(akicheng teni) kikah a gal (cold war) kipat nan ahung umdoh jitan ahi, kingailut tah sang in kigimbol nan ineilouvin ahi. Hijeh chun noi’a thudoh 3 hohi eima leh eima ana kidong patep tadiu hite:
1. Kichen (marriage) kiti hi Pathen phudoh ham? Or Kuki te phudoh ham?
2. Numei leh Pasal hina hi Pathen sem ham? Or Kuki te sem ham?
3. Kichen (Marriage) kiti hi demand letter or order kipeh to nadia Pathen in aphudoh ham? Or Christian Insung semdoh nadia Pathen in aphu doh ham?

Or Christian Insung semdoh nadia Pathen in aphu doh ham?
Hiche ho jouse hi lutah’a ngaito thah angai lheh tan ahi. Ipi jeh’a numei leh pasal hina hi Kuki ten business bolnapi bang’a iman’u ahitadem? Hiche pihi Kuki te Custom leh culture neite kahiuve ikiti uva ikithang-atpi’u hi jachat umtah hilou ding ham? I-kichen’u hi Pathen programme ahi tihi khatvei-vei beh ikidoh khah jilouvu ahingap dem? Veu hite! I-kichen naova Pathen ipansah lou jeh uvin Kuki te ikichen uva pat in gal (cold war) a pung cheh cheh in, Insung khat le insung khat jong kingailut tah sang in kivetdana joh in idim gam taovin ahi. Dantheng in ikicheng uvin Pathen minin kitepna isem jiuvin ahivang in Pathen thupeh leh adei in ichonji pouvin ahi.

Kuki te ikichen dan’u hi Pathen in hinve leh alunglhai mong mong nadem tihi ahi? Man-le-Mol a ikiha meh behseh tah jeh uvin mi atamjo thangtom man in aji-acha toh kikhen ding jong iman agelji tapouvin ahi. Tulang vang hin kichen kiti hi chomkhat kah nopsah namai mai dia kibol danin aumdoh gotan ahi. Ajeh chu aputen ahameh behseh ho akipah thei behseh pon ahi, hitiho jal hin ajipa’n jong ajinu ngailu loheh jong leh athangtom jeh’a engbol’a deldoh ahilou leh nungah dang toh kichen choppi jong umda lou ahitan, hitiho jeh hin jong numei pasal jonna lam’a HIV ahilou le nat phalou kihuilut le thejal jong kivat talou ahi.

Hiti bep’a hi custom iman chatvei jingdiu ahile i-custom’u hi kithang-atpi thei tah ahi, itithei mong nadiu vem? Keivang kajah acha valle i-custom mandan’u hi. I-kichen dan’u hi Sum(money) a ivet behseh tah jeh uvin pasal le numei atamjo hi guhthim a chonse-se jeng a, jinei ngam talouva aguh a naosen suhlhah(abortion) a ahinkho atamjo mang loi jong mi tamtah umdoh ahitai.

Hiche hi nampi chunga sapset na (curse) lhun na thei lampi phatah hilou ding ham? Naosen tamtah nullah kom (cannel) lah Dustbin (nen kholna bom) leinoi noi lah (Bridge), lampam tiho’a chapang naosen athisa kipei tamtah mudoh in aum tan ahi. Hiche ho hi Nampi ding a kichat umtah thil hilou ding ham? Hitobang chonna hi eiho Kuki custom chon na dia nadei mong mong hinam?

Man-le-mol a sangtah tah a kimeh’a a-lakh a-lakh sei a Devil family semdoh sang a, min ajiman ajo kham kham apeh a Christian family asem doh ding hi phajo hilou ham?
Mi masaho, Abraham khanglai, Jocob khanglai ho’a jong jinei-kichen ni leh demand letter kipeto a case ajat jat akibol tona namu doh khah em? Bible a kon ajong?
Ipi atileh nachanu ajinei nileh Christian Insung asemdoh ding hinam asemdoh lou ding ham ti gellouva, sum ijat ahin khum diu hinam tipouva nakisah lal ham?
Hitobang custom neite ihijeh uvin ikichen chan un gal (cold war) atam cheh cheh in inam piu aboi cheh cheh in ahi.

Kichen kiti hi Pathen programme ahi itithei tokahseuva hi inampi uva sapset (curse) ichan cheh-cheh diu ahi tihi het angai e.

Kuki chaten igel diuva phatah chu kachanu hi Christian Insung tungdoh dia Pathen in agon ahin, sum(money) holdia jinei ahipoi tihi het angai kit e. Pathen in numei-pasal hina hi sum holna dia asem ahipoi, ama programme lolhin thei nadia asemjoh ahi tihi het angai e.
Numei khat BOC a kijoh khat Interview kabolna a chun hitin asei in ahi, “Kajipa te chu avaichat jeh uvin ka-inkote’n kajipa toh eisukhen uvin, amasang a ahousa jep khat toh eimoh suhto kigot jeh uvin force in keila kanom pon, hijeh hin kahinkho man akisuh tapo’n, kijoh (prostitute) a lutdoh kahi tai” ati’n ahi. Hiche hin avetsah chu sum nei-nei toh kachanu ki cheng tei-tei hen iti jeh uva chapang naosen tamtah hinkho lamvai gam ahitai.

Pathen ging lou nam mite chu mangthai ding ahi tihi het angai e. Hijeh’a chu mihem hi Business bol nathei ahipoi ti het angai in ahi.

Noah khanglai in jong numei-pasal hina hi jonthanghoina leh kichepnan ana mang uvin ahileh Pathen in asumang hel uvin ahi. Akhu ti leh Kuki te chu asuhmang heltheilou dia nagel ham?
Sum (money) deichat jeh pouvin nachanu chu aji acha toh khendan, hichu Pathen dei-le-tup ahipoi.

Oh! Kanam mite!
Pathen igin uva athupeh ijui teng’u leh gamtum jong eipeh diu ahin,
Kukite’n igin’u hivang eimaho manthai nading jeng ahibouve.

Advertisements